ନୂଆଦିଲ୍ଲୀ : କରୋନା ଭାଇରସ ବିରୋଧରେ ମୁକାବିଲା ପାଇଁ ନୂତନ ପ୍ରଣାଳୀ ଏବଂ ଗବେଷଣା ଉପରେ ସମଗ୍ର ବିଶ୍ୱର ଗବେଷକମାନେ କାର୍ଯ୍ୟ କରୁଛନ୍ତି । କରୋନା ଜୀବାଣୁକୁ ପରାସ୍ତ କରିବା ପାଇଁ ଆଇସିଏମ୍ଆର ଏକ ଅଭିନବ ପଦ୍ଧତି ଘୋଷଣା କରିଛି । ହାଇଦ୍ରାବାଦର ଫାର୍ମା କମ୍ପାନୀ ବାୟୋଲୋଜି ଇ ଲିମିଟେଡ୍ ସହିତ ଆଇସିଏମ୍ଆର କରୋନା ଚିକିତ୍ସା ପାଇଁ ଆଣ୍ଟିସେରା ବିକାଶ କରିଛି । ବୈଜ୍ଞାନିକମାନେ ଏହାକୁ ପଶୁମାନଙ୍କ ଭିତରେ ବିକଶିତ କରିଛନ୍ତି । ବାସ୍ତବରେ, ଆଣ୍ଟିସେରା ହେଉଛି ପଶୁମାନଙ୍କଠାରୁ ନିଆଯାଇଥିବା ରକ୍ତ ସେରମ୍ । ସେଥିରେ ଏକ ନିର୍ଦ୍ଦିଷ୍ଟ ଆଣ୍ଟିଜେନକୁ ପ୍ରତିହତ କରିବା ପାଇଁ ଆଣ୍ଟିବାଡି ଥାଏ । ଡାକ୍ତରଙ୍କ ଅନୁଯାୟୀ, ଏକ ନିର୍ଦ୍ଦିଷ୍ଟ ରୋଗର ଚିକିତ୍ସା କିମ୍ବା ରୋକିବା ପାଇଁ ଏହା ଏକ ଇଞ୍ଜେକ୍ସନ୍ ଭାବରେ ଦିଆଯାଏ । କରୋନା ଚିକିତ୍ସା ପାଇଁ ସେହି ଆଣ୍ଟିସେରା ପ୍ରସ୍ତୁତ କରାଯାଇଛି । ଏହା କୁହାଯାଇପାରିବ ଯେ ବର୍ତ୍ତମାନ ପଶୁମାନଙ୍କ ରକ୍ତରେ କରୋନା ଚିକିତ୍ସା ହୋଇପାରିବ । ସୂଚନାଯୋଗ୍ୟ, ଆଜି ୮୧୪୮୪ ଟି ନୂଆ କରୋନା ସଂକ୍ରମଣର ମାମଲା ରିପୋର୍ଟ ହୋଇଛି । ଯାହା ପରେ ଦେଶରେ ମୋଟ ଭାଇରସ ସଂକ୍ରମଣ ୬୩ ଲକ୍ଷରୁ ଉର୍ଦ୍ଧ୍ୱରେ ପହଞ୍ଚିଛି । ଏଥି ସହିତ ଦେଶରେ ବର୍ତ୍ତମାନ ସୁଦ୍ଧା ୫୩ ଲକ୍ଷରୁ ଅଧିକ ଲୋକ ସଂକ୍ରମଣମୁକ୍ତ ହୋଇଛନ୍ତି । ମହାମାରୀ ଯୋଗୁଁ ପ୍ରାୟ ଏକ ଲକ୍ଷ ରୋଗୀଙ୍କ ମୃତ୍ୟୁ ଘଟିଛି ।
