ଭାରତରେ ବିଚ୍ଛିନ୍ନତାବାଦୀଙ୍କୁ ନେଇ ବିଦ୍ରୋହ ଆରମ୍ଭ କରିପାରେ ଚୀନ୍

ନୂଆଦିଲ୍ଲୀ : ଚୀନ କମ୍ୟୁନିଷ୍ଟ ପାର୍ଟି ସହ ଜଡିତ ଏକ ଖବରକାଗଜ ଭାରତକୁ ଚେତାବନୀ ଦେଇଛି ଯେ ଚୀନ୍ ଭାରତ ବିରୋଧରେ ଆଭ୍ୟନ୍ତରୀଣ ବିଦ୍ରୋହ ଆରମ୍ଭ କରିପାରେ । ଗ୍ଲୋବାଲ ଟାଇମ୍ସରେ ପ୍ରକାଶିତ ଏକ ଆର୍ଟିକିଲରେ ଏହା କୁହାଯାଇଛି ଯେ ଯଦି ଭାରତ ‘ତାଇୱାନ କାର୍ଡ’ ଖେଳିବା ଜାରି ରଖେ ତେବେ ଚୀନ୍ ମଧ୍ୟ ଭାରତ ବିରୋଧରେ ପଦକ୍ଷେପ ନେଇପାରେ । ଗ୍ଲୋବାଲ ଟାଇମ୍ସ ଖବରକାଗଜ ପ୍ରବନ୍ଧରେ ଚେଙ୍ଗଡୁ ଇନଷ୍ଟିଚ୍ୟୁଟ୍ ଅଫ୍ ୱାର୍ଲ୍ଡ ଆଫେୟାର୍ସର ସଭାପତି ଲଙ୍ଗ ଜିଙ୍ଗଚୁନ୍ କହିଛନ୍ତି ଯେ ସୀମା ଉପରେ ଚୀନ୍ ଏବଂ ଭାରତ ମଧ୍ୟରେ ·ଲିଥିବା ତିକ୍ତତା ସମୟରେ ଭାରତ ତାଇୱାନ କାର୍ଡ ଖେଳିବାରେ ଅଭ୍ୟସ୍ତ ହୋଇପଡିଛି । ଖବରକାଗଜରେ କୁହାଯାଇଛି ଯେ ଭାରତ ଏପର୍ଯ୍ୟନ୍ତ ୱାନ ଚାଇନା ନୀତି ଅନୁସରଣ କରୁଛି ଏବଂ ସେଥିପାଇଁ ଚୀନ୍ ଭାରତରେ ବିଚ୍ଛିନ୍ନତାବାଦୀଙ୍କୁ ସମର୍ଥନ କରୁନାହିଁ । କିନ୍ତୁ ଯଦି ଭାରତ ତାଇୱାନକୁ ସମର୍ଥନ ଜାରି ରଖେ ତେବେ ଚୀନ୍ ଭାରତରେ ବିଦ୍ରୋହ ଆରମ୍ଭ କରିପାରିବ । ଚୀନ କମ୍ୟୁନିଷ୍ଟ ପାର୍ଟି ସହ ସଂଯୁକ୍ତ ଏକ ଖବରକାଗଜରେ କୁହାଯାଇଛି ଯେ ଚୀନ୍ ଉତ୍ତର ପୂର୍ବ ରାଜ୍ୟ, ତ୍ରିପୁରା, ମେଘାଳୟ, ମିଜୋରାମ, ମଣିପୁର, ଆସାମ ଏବଂ ନାଗାଲାଣ୍ଡରେ ବିଚ୍ଛିନ୍ନତାବାଦୀଙ୍କୁ ଭାରତରେ ବିଦ୍ରୋହ ପାଇଁ ସମର୍ଥନ ଯୋଗାଇପାରେ । କାରଣ ଏଠାରେ ଥିବା ଲୋକମାନେ ଏକ ଭିନ୍ନ ଜାତିର ଅଟନ୍ତି ଯେଉଁମାନେ ନିଜକୁ ଭାରତର ଅଂଶ ବୋଲି ଭାବନ୍ତି ନାହିଁ ଏବଂ ଏହି ଅଞ୍ଚଳଗୁଡିକ ମଧ୍ୟରୁ ଅନେକ ବ୍ରିଟିଶ ଶାସନ ପୂର୍ବରୁ ମିଆଁମାରର ଅଂଶ ଥିଲେ । ଚାଇନାର ଖବରକାଗଜରେ କୁହାଯାଇଛି ଯେ ତାଇୱାନ କାର୍ଡ ଖେଳିବା ଦ୍ୱାରା ଭାରତ ନିଜର ସ୍ୱାର୍ଥକୁ କ୍ଷତି ପହଞ୍ଚାଉଛି । ଚେଙ୍ଗଡୁ ଇନଷ୍ଟିଚ୍ୟୁଟ୍ ଅଫ୍ ୱାର୍ଲ୍ଡ ଆଫେୟାର୍ସର ସଭାପତି ଲଙ୍ଗ ଜିଙ୍ଗଚୁନ୍ କହିଛନ୍ତି ଯେ ଯଦି ଭାରତର ବିଚ୍ଛିନ୍ନତାବାଦୀମାନେ ଚୀନ୍ର ସମର୍ଥନ ପାଆନ୍ତି, ତେବେ ସେମାନେ ବିଦ୍ରୋହ ଆରମ୍ଭ କରିପାରିବେ । ବିଚ୍ଛିନ୍ନତାବାଦୀଙ୍କ ମଧ୍ୟ ମିଆଁମାରର ସୁରକ୍ଷା ବାହିନୀ ସହିତ ଘନିଷ୍ଠ ସମ୍ପର୍କ ଥିବା କୁହାଯାଉଛି ।

Leave a Reply

Your email address will not be published. Required fields are marked *