ନୂଆପଡ଼ା,୧୮ା୧୨ : ନୂଆପଡ଼ା ଜିଲ୍ଲା କୋମନା ଥାନା ବିଲେନଜୋର ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଏଥିରେ ସ୍ୱାମୀ ଓ ସ୍ତ୍ରୀଙ୍କ ମୃତ୍ୟୁ ହୋଇଥିବା ବେଳେ ୫ରୁ ଉର୍ଦ୍ଧ ଗୁରୁତର ଆହତ ହୋଇଛନ୍ତି ।
କୋମନା ଥାନା ତରବୋଡ ଗାଁ ଗଜିନ୍ଦ୍ର ଦଣ୍ଡସେନାଙ୍କ ଝିଅକୁ ବଲାଙ୍ଗୀର ଜିଲ୍ଲା ବୋଙ୍ଗୋମୁଣ୍ଡାରେ ବିବାହ ଦେଇଥିଲେ । ସେଠାରେ ଝିଅ ଓ ଜ୍ୱାଇଁଙ୍କ ମଧ୍ୟରେ କଲହ ହୋଇଥିଲା । ଆଜି ସକାଳେ ଝିଅ ଜ୍ୱାଇଁଙ୍କ ଝଗଡାର ସମାଧାନ କରିବା ପାଇଁ ଗଜିନ୍ଦ୍ର ଓ ପରିବାର ଲୋକେ ବଙ୍ଗୋମୁଣ୍ଡାକୁ ଯାଇଥିଲେ । ବଙ୍ଗୋମୁଣ୍ଡାରୁ ଖାଇ ସାରି ରାତିରେ ତରବୋଡକୁ ବୋଲେରୋ ଗାଡିରେ ଫେରୁଥିଲେ । ଏକ ଟ୍ରକ ନୂଆପଡ଼ା ପଟୁ ଖଡିଆଳ ପଟେ ଯାଉଥିଲା । ରାତି ପ୍ରାୟ ୧୧.୧୫ରେ ଜାତୀୟ ରାଜପଥ ୩୫୩ ଉପରେ କୋମନା ଥାନା ବିଲେନଜୋର ନିକଟରେ ଟ୍ରକ ଓ ବୋଲେରୋ ମୁହାଁମୁହିଁ ଧକ୍କା ହୋଇଥିଲା । ଫଳରେ ବୋଲେରୋ ଗାଡି ଟ୍ରକ ସମ୍ମୁଖ ଭାଗରେ ପିଟି ହୋଇ ଭିତରକୁ ପଶି ଯାଇଥିଲା । ତରବୋଡର ଗଜିନ୍ଦ୍ର ଦଣ୍ଡସେନା(୫୦) ଓ ସ୍ତ୍ରୀ ସୁଦେଶିନି ଦଣ୍ଡସେନା(୪୫)ଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବା ଜଣା ପଡିଛି । ଏଥିରେ ତରବୋଡର ଦୁର୍ଲଭ ଦଣ୍ଡସେନା(୩୫), ଜୟପ୍ରକାଶ ଗହୀର(୫୦), ଲିଲାବତୀ ବାଗ(୪୫), ଗିରୀଧାରୀ ବାଗ(୫୫), ରିଦ୍ଧି ପାତ୍ର(୧୧) ଗୁରୁତର ଆହାତ ହୋଇଥିବା ଖବର ମିଲିଛି । ସେଥିରୁ ଜୟପ୍ରକାଶ ଓ ରିଦ୍ଧିଙ୍କ ସ୍ୱାସ୍ଥ୍ୟାବସ୍ଥା ସଂକଟ୍ଟାପନ୍ନ ଥିବାରୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । କୋମନା ପୁଲିସ ଓ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ôଚ ତଦନ୍ତ ଜାରି ରଖିଛନ୍ତି ।
