ସମସ୍ତଙ୍କୁ ସହଜରେ ଟିକା ଯୋଗାଇବା ଭାରତ ପରି ଏକ ବିଶାଳ ଦେଶ ପାଇଁ ଏକ ବୃହତ୍ ଆହ୍ୱାନ । ବାସ୍ତବରେ ବିଶ୍ୱରେ ବିକ୍ରି ହେଉଥିବା ଟିକା ମଧ୍ୟରୁ ୬୦ ପ୍ରତିଶତ କେବଳ ଭାରତରେ ଉତ୍ପାଦିତ ହୁଏ । ଭାରତର ଫାର୍ମା କ୍ଷେତ୍ରର ମୂଲ୍ୟ ପ୍ରାୟ ୨.୯ ଲକ୍ଷ କୋଟି ଟଙ୍କା । ନିକଟରେ ଭାରତରେ ଅଷ୍ଟ୍ରେଲିଆର ରାଷ୍ଟ୍ରଦୂତ ଭାରତରେ ଟିକା ପ୍ରସ୍ତୁତ କରୁଥିବା କମ୍ପାନୀ ଗସ୍ତ କରିଥିଲେ । ସେ କହିଛନ୍ତି ଯେ ବିଶ୍ୱର ଆବଶ୍ୟକତା ପୂରଣ କରିବା ପାଇଁ କେବଳ ଭାରତରେ ଟିକା ଉତ୍ପାଦନ କରିବାର କ୍ଷମତା ରହିଛି । ବିଶ୍ୱର ଅନ୍ୟ ଦେଶର କୂଟନୀତିଜ୍ଞମାନେ ମଧ୍ୟ ଏହା କହିଛନ୍ତି । ଧନୀ ଦେଶମାନେ କରୋନା ଔଷଧ କିମ୍ବା ଟିକା ଉପରେ ସେମାନଙ୍କର ବୌଦ୍ଧିକ ସମ୍ପତ୍ତି ଅଧିକାର ଛାଡିବାକୁ ଚାହାଁନ୍ତି ନାହିଁ । ସେମାନଙ୍କ ପାଇଁ ମାନବିକତାର କୌଣସି ଅର୍ଥ ନାହିଁ । କେବଳ ଲାଭକ୍ଷତିର ହିସାବ ହିଁ ସେମାନେ ଦେଖିଥାନ୍ତି । ବିଶେଷ କରି ୟୁରୋପୀୟ ୟୁନିଅନ୍ ଏବଂ ଆମେରିକା ବୌଦ୍ଧିକ ସମ୍ପତ୍ତି ଅଧିକାର ଛାଡିବା ପ୍ରସ୍ତାବକୁ ବିରୋଧ କରିଥିଲେ । ଯଦି ଏହି ଧାରା ଜାରି ରହେ, ତେବେ ବିଶ୍ୱ ବାଣିଜ୍ୟ ସଂଗଠନରେ ଏହି ବିରାଟ ସମସ୍ୟା ଉପୁଜିବ ଏଥିରେ ସନ୍ଦେହ ନାହିଁ । ଏକଚାଟିଆମୁକ୍ତ ହେବାର ପକ୍ଷ ରଖୁଥିବା ବିଶେଷଜ୍ଞମାନେ କହିଛନ୍ତି ଯେ ଯଦି ଧନୀ ଦେଶ ଏଥିରେ ସହମତ ହେବେନାହିଁ ତେବେ ଏହା କରୋନା ଯୁଦ୍ଧ ପଥରେ ଏକ ପ୍ରମୁଖ ପ୍ରତିବନ୍ଧକ ହୋଇପାରେ । ସେମାନେ ଅଭିଯୋଗ କରିଛନ୍ତି ଯେ ଏହି ଦେଶଗୁଡ଼ିକ ଲୋକଙ୍କ ଜୀବନ ଅପେକ୍ଷା ସେମାନଙ୍କର ଲାଭ ଉପରେ ଅଧିକ ଧ୍ୟାନ କେନ୍ଦ୍ରୀଭୂତ କରିଥାନ୍ତି । ଭାରତ ଏବଂ ଦକ୍ଷିଣ ଆଫ୍ରିକା ଭଳି ଦେଶ ପ୍ରଥମେ ଅଧିକାର ଛାଡ ପ୍ରସ୍ତାବ ଦେଇଥିଲେ । ବାସ୍ତବରେ ଅଧିକାଂଶ ଦେଶ ଯେଉଁମାନଙ୍କୁ ପ୍ରଥମେ ଟୀକାକରଣ କରାଯିବ ବୋଲି ଆଶା କରାଯାଏ, ସେମାନେ ଧନୀ ଦେଶ ଅଟନ୍ତି । ଦୁନିଆ ବର୍ତ୍ତମାନ ବାସ୍ତବରେ ଏକ ବିଶ୍ୱସ୍ତରୀୟ ଗାଁ । ଯଦି ଚାଇନାରେ ଏକ ଜୀବାଣୁ ଆକ୍ରାନ୍ତ ହୁଏ, ତେବେ ଆମେରିକାରେ ମଧ୍ୟ ଲୋକମାନେ ମରିବେ । ଯେପରି ମଣିଷମାନଙ୍କ ପାଇଁ ଦୁନିଆର ଗୋଟିଏ ପ୍ରାନ୍ତରୁ ଅନ୍ୟ ପ୍ରାନ୍ତକୁ ଯିବା ସହଜ ଏବଂ ତୀବ୍ର ହୋଇଛି, ସେହିଭଳି କୌଣସି ଭଲ ଏବଂ ଖରାପ ଜିନିଷ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ପହଞ୍ଚିବା ପାଇଁ କିଛି ଘଣ୍ଟା ହିଁ ବହୁତ । କିନ୍ତୁ ବିଶ୍ୱସ୍ତରୀୟ ନେତାମାନେ ଏହା ବୁଝନ୍ତି ନାହିଁ । ଉଦାହରଣ ସ୍ୱରୂପ, ଚୀନ୍ ନିଜର ଭାବମୂର୍ତ୍ତିକୁ ବଞ୍ଚାଇବା ପାଇଁ କରୋନା ବିସ୍ଫୋରଣ ବିଷୟରେ କହିବାରେ ବିଳମ୍ବ କଲା ଯାହାଦ୍ୱାରା ଆଜି ସମଗ୍ର ବିଶ୍ୱ ଦୁଃଖ ଓ ଆତଙ୍କରେ କାଳ କାଟୁଛି । ଧନୀ ଦେଶମାନେ ଚାହାନ୍ତି କି ପ୍ରଥମେ ସେମାନେ ନିଜ ନାଗରିକଙ୍କୁ ଭ୍ୟାକ୍ସିନ୍ ଦେଇ ନିଜ ଦେଶର କମ୍ପାନୀକୁ କିପରି ଅଧିକ ଲାଭ ପହଞ୍ଚାଇବେ । କରୋନା ଭାଇରସ୍ ଯେତିକି ମାତ୍ରାରେ ଲୋକଙ୍କୁ ମୃତ୍ୟୁମୁଖରେ ପକାଉଛି ଠିକ୍ ସେହିପରି ଆର୍ଥିକ କ୍ଷେତ୍ରକୁ ମଧ୍ୟ ରସାତଳଗାମୀ କରୁଛି । ଏବେ ଅଧିକାଂଶ ଦେଶ ପାଇଁ ବେପାର ବାଣିଜ୍ୟ ରୋକିବା ମୁସ୍କିଲ୍ ହୋଇପଡ଼ିଛି । ବିକଶିତ ଦେଶମାନେ ଅନ୍ୟକୁ ଭ୍ୟାକ୍ସିନ୍ ଦେବେ ନାହିଁ କିନ୍ତୁ ଦେଶ ଦେଶ ମଧ୍ୟରେ ବାଣିଜ୍ୟ ଜାରି ରଖିବେ ବୋଲି କହିବା ବାସ୍ତବିକ ହାସ୍ୟାସ୍ପଦ ନୁହେଁ ତ କ’ଣ ହୋଇପାରେ । ବର୍ତ୍ତମାନର ସମୟ ଲାଭଖୋର କିମ୍ବା ସ୍ୱାର୍ଥନ୍ୱେଷୀ ହେବାର ସମୟ ନୁହେଁ ବରଂ ହୃଦୟ ଜିତିବାର ସମୟ । ଆମ ଲୋକ, ତୁମ ଲୋକ ନୁହଁ ବରଂ ସାରା ଦୁନିଆର ଲୋକ । କାଲି ପାଇଁ ନୁହେଁ ବରଂ ବର୍ତ୍ତମାନ ପାଇଁ ଭାବିବାର ସମୟ ।
