ଧର୍ମଗଡ଼,୨୪/୦୫(ଡିକେ ନ୍ୟୁଜ): ରାଜ୍ୟ ସରକାର ଙ୍କ ମୁଖ୍ୟମନ୍ତ୍ରୀ କର୍ମତତ୍ପର ଯୋଜନା (ମୁକ୍ତା) ଅନ୍ତର୍ଗତ ରେ ରାଜ୍ୟର ସମସ୍ତ ପୌରାଞ୍ଚଳ ରେ ବର୍ଷାଜଳ ଅମଳ ପ୍ରକଳ୍ପ ଯୋଜନା କାର୍ଯ୍ୟକାରୀ କରିବାକୁ ଜିଲ୍ଲା ପ୍ରଶାସନ ଅଣ୍ଟା ଭିଡ଼ିଛି। ଏନେଇ ଆଜି ଧର୍ମଗଡ଼ ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟାଳୟ ଠାରେ ଧର୍ମଗଡ଼ ଉପଜିଲ୍ଲାପାଳ ତଥା କାର୍ଯ୍ୟନିର୍ବାହୀ ଅଧିକାରୀ ସଚିନ ପାୱାର ପ୍ରକାଶ, ଆଇଏଏସ ଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ଧର୍ମଗଡ ଏନଏସି ଅଧ୍ୟକ୍ଷ ଶ୍ରୀ ଅଶୋକ କୁମାର ମହାନ୍ତି ଓ ଉପାଧ୍ୟକ୍ଷା ଶ୍ରୀମତୀ ମନୀଷା ରାଣୀ ମିଶ୍ର ଓ ସ୍ଥାନୀୟ ବୁଦ୍ଧିଜୀବୀ ମାନେ ଯୋଗଦେଇଥିଲେ । ଜଳବାୟୁ ପରିବର୍ତ୍ତନ ଯୋଗୁଁ ସଂପ୍ରତି ଭୂପୃଷ୍ଠରୁ ଜଳସ୍ତର କ୍ରମଶଃ କମି ଆସୁଛି। ବର୍ଷା ଜଳକୁ ଏବେଠାରୁ ସଂରକ୍ଷଣ ପାଇଁ ସମସ୍ତେ ଚିନ୍ତା କରିବାକୁ ହେବ । ଆଗାମୀ ପୀଢ଼ି ଯେପରି ଜଳକଷ୍ଟ ନ ଭୋଗିବେ ସେଥିପାଇଁ ବର୍ଷା ଜଳ ସଂରକ୍ଷଣ ପାଇଁ ସମସ୍ତେ ଆଗେଇ ଆସିବା ପାଇଁ ଉପଜିଲ୍ଲାପାଳ ସମସ୍ତଙ୍କୁ ଅନୁରୋଧ କରିଥିଲେ। ଏହି ଅବସର ରେ ଧର୍ମଗଡ ଏନଏସି ର କନିଷ୍ଠ ଯନ୍ତ୍ରୀ ରାଧାମୋହନ ରାୟ ବର୍ଷା ଜଳ ସଂରକ୍ଷଣ କିପରି କରାଯାଇ ପାରିବ ଓ ଏଥିପାଇଁ କିପରି କମ ଖର୍ଚ୍ଚରେ ସୋ ପିଟ ନିର୍ମାଣ ହେବ ତା ଉପରେ ସୂଚନା ପ୍ରଦାନ କରିଥିଲେ। କଳାହାଣ୍ଡି ଜିଲ୍ଲାପାଳ ଙ୍କ ନିର୍ଦ୍ଦେଶ କ୍ରମେ ପ୍ରଥମେ ଧର୍ମଗଡ଼ ଏନଏସିରେ ଏହି କାର୍ଯ୍ୟକ୍ରମ ହାତକୁ ନିଆଯାଇଥିବା ଏବଂ ପ୍ରଥମ ପର୍ଯ୍ୟାୟରେ ବର୍ଷା ଜଳ ସଂରକ୍ଷଣ ପାଇଁ ଧର୍ମଗଡଏନଏସି ପକ୍ଷରୁ ପ୍ରାୟ ୨୦୦ ଗୋଟି ସଂପ ସରକାରୀ ଜମିରେ କରିବା ପାଇଁ ସ୍ଥିରୀକୃତ ହୋଇଛି ବୋଲି ଉପଜିଲ୍ଲାପାଳ ବୈଠକରେ ପ୍ରକାଶ କରିଥିଲେ । ଏଥିସହିତ ବେସରକାରୀ ସ୍ତରରେ ଘରର ଛାତ ଉପରୁ ପଡୁଥିବା ବର୍ଷା ଜଳକୁ ସଂରକ୍ଷଣ କରିବା ପାଇଁ ଧର୍ମଗଡ଼ ବାସିନ୍ଦା କୁ ଶ୍ରୀ ପ୍ରକାଶ ଅନୁରୋଧ କରିଥିଲେ । ଅଞ୍ଚଳ ବାସିନ୍ଦା ମାନେ ଏହି ପ୍ରକଳ୍ପ କୁ ତ୍ୱରାନ୍ୱିତ କରିବା ପାଇଁ ନିଜ ନିଜ ଗୃହରେ ସପ ନିର୍ମାଣ ପାଇଁ ଆଗଭର ହେଲେ ଆଗାମୀ ଦିନ ରେ ଜଳ କଷ୍ଟ ରୁ ଦୁରପାଇବା ବୋଲି ପରାମର୍ଶ ଦେଇଥିଲେ । ଏଥିପାଇଁ ଏନଏସି ପ୍ରତି ୱାର୍ଡ ସ୍ତରରେ କମିଟି ଗଠନ କରାଯାଇ ଜନସଚେତନତା ସୃଷ୍ଟି କରାଯିବା ପାଇଁ ବୈଠକରେ ନିଷ୍ପତ୍ତି ହୋଇଥିଲା । ଏହି ବୈଠକରେ ଧର୍ମଗଡ଼ ର ବହୁ ବୁଦ୍ଧିଜୀବୀ ଓ ସାମ୍ବାଦିକ ଯୋଗ ଦେଇ ସୁଚିନ୍ତିତ ମତାମତ ପ୍ରଦାନ କରିଥିଲେ ।
