ଓଡ଼ିଶାରେ ୨୬ ଶିଶୁଙ୍କୁ ଟମାଟୋ ଫ୍ଲୁ

0 58

ଭୁବନେଶ୍ୱର, ୨୦ା୮(ଡିକେ ନ୍ୟୁଜ): କୋଭିଡ, ମଙ୍କିପକ୍ସ ପରେ ଏବେ ଟମାଟୋ ଫ୍ଲୁ ଭୟ । ଗତ ୨ବର୍ଷ ଧରି କରୋନା ମହାମାରୀରୁ ତ୍ରାହି ମିଳିନଥିବା ବେଳେ ଦେଶରେ ନୂଆ ଭାଇରସର ଭୟ ବଢିଛି । ଟମାଟୋ ଫ୍ଲୁ ନେଇ ସତର୍କ କରିଛି ବ୍ରିଟେନର ଲୋକପ୍ରିୟ ସ୍ୱାସ୍ଥ୍ୟ ପତ୍ରିକା ଲାନସେଟ୍ । ଓଡ଼ିଶାରେ ବାହାରିଛି ଟମାଟୋ ଫ୍ଲୁ କେସ୍ । ୧ ବର୍ଷରୁ ୯ ବର୍ଷ ବୟସର ୨୬ ଶିଶୁ ଟମାଟୋ ଫ୍ଲୁରେ ଆକ୍ରାନ୍ତ ହୋଇଥିବା ଆରଏମ୍‌ଆରସି ଭୁବନେଶ୍ୱର ପକ୍ଷରୁ ସୂଚନା ଦିଆଯାଇଥିବା ଲାନ୍‌ସେଟ୍ କହିଛି । ମେ ୬ ତାରିଖରେ କେରଳର କୋଲ୍ଲମ ଜିଲ୍ଲାରେ ପ୍ରଥମ ଟମାଟୋ ଫ୍ଲୁ କେସ ବାହାରିଥିଲା । ଜୁଲାଇ ୨୬ ସୁଦ୍ଧା କେରଳରେ ୫ ବର୍ଷରୁ କମ ବୟସର ୮୨ ଶିଶୁ ଟମାଟୋ ଫ୍ଲୁରେ ସଂକ୍ରମିତ ହୋଇଥିବା ସ୍ପଷ୍ଟ ହୋଇଛି । ଏହାପରେ ଆଲର୍ଟରେ ରହିଛି ତାମିଲନାଡୁ ଓ କର୍ଣ୍ଣାଟକ । କେରଳ, ତାମିଲନାଡୁ ଏବଂ ଓଡ଼ିଶା ବ୍ୟତୀତ ଅନ୍ୟ ରାଜ୍ୟରେ ଟମାଟୋ ଫ୍ଲୁ ଦେଖାଦେଇ ନଥିବା ଲାନସେଟ ପତ୍ରିକାରେ କୁହାଯାଇଛି । ସାଧାରଣତଃ ୫ ବର୍ଷରୁ କମ ବୟସର ଶିଶୁଙ୍କ ଠାରେ ଟମାଟୋ ଫ୍ଲୁ ଦେଖାଯାଇଥାଏ । ଟମାଟୋ ଫ୍ଲୁ ଆକ୍ରାନ୍ତଙ୍କଠାରେ ଜ୍ୱର, ଭୋକ ନ ଲାଗିବା, ବାନ୍ତି ହେବା, ଝାଡା, ହାଲିଆ ଲାଗିବା ଓ ପାଟି ପାଖରେ ଘା ହେବା ଭଳି ଲକ୍ଷଣ ଦେଖାଯାଇଥାଏ । ସେହିପରି ଚର୍ମ ଲାଲ ପଡିଥାଏ । ତେବେ ଏହାକୁ କେବଳ ପ୍ରତିଷେଧକ ଗ୍ରହଣ ଦ୍ୱାରା ଏଡ଼ାଇ ଦିଆଯାଇପାରିବ । ଟମାଟୋ ଫ୍ଲୁ ଆତଙ୍କିତ ହେବ ଭଳି ରୋଗ ନୁହେଁ । ଏଥିରେ ପୀଡିତ ୯୯ ପ୍ରତିଶତରୁ ଅଧିକ ଭଲ ହେଇଯାଆନ୍ତି । ମୃତ୍ୟୁ ସଂଖ୍ୟା ମଧ୍ୟ ବହୁତ କମ୍ । ପିଲାଙ୍କୁ ଏହି ରୋଗ ହେଲେ ଆଇସୋଲେସନ୍‌ରେ ରଖନ୍ତୁ । ଯେଉଁ ଲକ୍ଷଣ ହେଉଛି ସେହି ମେଡ଼ିସିନ୍ ଦିଅନ୍ତୁ ବୋଲି କହିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ । ଟମାଟୋ ଫ୍ଲୁରେ ଥରେ ସଂକ୍ରମିତ ହୋଇଥିବା ପିଲା ଦ୍ୱିତୀୟ ଥର ସଂକ୍ରମିତ ହେବା ଆଶଙ୍କା ରହିଛି । ସଂକ୍ରାମକ ରୋଗ ହୋଇଥିବାରୁ ଲକ୍ଷଣ ଦେଖାଦେଲେ ଆକ୍ରାନ୍ତ ପିଲାଙ୍କୁ ଅନ୍ୟ ସହ ମିଶିବା ମନା । ଆକ୍ରାନ୍ତଙ୍କୁ ଯଥାସମ୍ଭବ ପରିଷ୍କାର ଓ ପରିଚ୍ଛନ୍ନ ପରିବେଶରେ ରଖିବା ସହ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ କୁହାଯାଇଛି । ନିର୍ଦ୍ଦିଷ୍ଟ ଔଷଧ ନଥିବାରୁ ଲକ୍ଷଣ ଅନୁସାରେ ଚିକିତ୍ସା ହୋଇଥାଏ ।

Leave A Reply

Your email address will not be published.