ଭୁବନେଶ୍ୱର, : ଭୁବନେଶ୍ୱର ମହାନଗର ନିଗମ ବିନା କୌଣସି ସ୍ୱୀକୃତିରେ ଗାଡ଼କଣ ଠାରେ ଦୀର୍ଘ ବର୍ଷ ଧରି ବେଆଇନ ଭାବେ ଅଳିଆ ଗଦାଇ ଅଧା ଭୁବନେଶ୍ୱରକୁ ହନ୍ତସନ୍ତ କରି ଆସୁଛି । ସୈନିକ ସ୍କୁଲ ଭଳି ଗୌରବମୟ ଅନୁଷ୍ଠାନର ଜମିକୁ ମାଡି ବସି ଦୁର୍ଗନ୍ଧ ସୃଷ୍ଟି କରି ଲକ୍ଷ ଲକ୍ଷ ଲୋକଙ୍କୁ ମରଣ ମୁହଁକୁ ଠେଲି ଚାଲିଛି । ଏହି ଅମାନବୀୟ କାର୍ଯ୍ୟକୁ ଦୀର୍ଘ ଦିନ ଧରି ବିରୋଧ କରି ଅନେକ ଆନ୍ଦୋଳନ ଓ ଧାରଣା କାର୍ଯ୍ୟକ୍ରମ ହାତକୁ ନେଇ ବିରୋଧ କରି ଆସୁଛି ସୈନିକ ସ୍କୁଲ ବଞ୍ଚାଅ ଓ ଅଳିଆ ଗଦା ହଟାଅ ଅଭିଯାନ । ଏହି କ୍ରମରେ ଅଭିଯାନର ପ୍ରତିନିଧି ମଣ୍ଡଳୀ ଦୁଇ ଦୁଇ ଥର ପ୍ରଦୂଷଣ ନିୟନ୍ତ୍ରଣ ବୋର୍ଡ କାର୍ଯ୍ୟାଳୟରେ ଆସି ବିଏମସି ବିରୁଦ୍ଧରେ ଅଭିଯୋଗ କରିଛନ୍ତି । ପୂର୍ବରୁ ପ୍ରଦୂଷଣ ବୋର୍ଡ ବିଏମସିକୁ ସେପ୍ଟେମ୍ବର ୩ ତାରିଖ ସୁଦ୍ଧା ଅଭିଯୋଗର ଉତ୍ତର ସହ ନିୟମ ଅନୁପାଳନ ନେଇ ସ୍ଥିତି ଦାଖଲ ରିପୋର୍ଟ ଦାଖଲ କରିବାକୁ କହିଥିଲେ । ଏହି ସମସ୍ୟା ଉପରେ ସୋମବାର ଅଭିଯାନର ଦିଲୀପ ଦାସ ଶର୍ମା, ଚିନ୍ତାମଣି ବାରିକ, ନିମାଇଁ ଚରଣ ଦାସ, ଆଶୁତୋଷ ମିଶ୍ରଙ୍କୁ ନେଇ ଏକ ପ୍ରତିନିଧି ମଣ୍ଡଳୀ ପଲ୍ୟୁସନ ବୋର୍ଡ କାର୍ଯ୍ୟାଳୟରେ ମେମ୍ବର ସେକ୍ରେଟାରୀ ଉମା ନାନ୍ଦୁରିଙ୍କୁ ଭେଟି ଦାବୀ ଉପସ୍ଥାପନା କରିଥିଲେ । ଆଲୋଚନା ସମୟରେ ବରିଷ୍ଠ ବୈଜ୍ଞାନିକ ଉଷାରାଣୀ ପଟନାୟକ ଉପସ୍ଥିତ ଥିଲେ । ମେମ୍ବର ସେକ୍ରେଟାରୀ ସୋମବାର ସ୍ୱତନ୍ତ୍ର ଭାବେ ବିଏମସିକୁ କଡା ନିର୍ଦ୍ଦେଶ ଦିଆଯିବ ଓ ନିଜେ ଅଳିଆ ଗଦା ପରିଦର୍ଶନରେ ଯିବେ ବୋଲି ପ୍ରତିନିଧି ମଣ୍ଡଳୀଙ୍କୁ କହିଥିଲେ । ଏହା ପରେ ସୋମବାର ଅପରାହ୍ନରେ ଏକ ତାଗିଦ ପୂର୍ଣ୍ଣ ଚିଠି ବିଏମସି କମିଶନରକୁ କରିଥିଲେ । ତାଙ୍କ ଚିଠି ଅନୁଯାଇ ଯେହେତୁ ଆଜି ପର୍ଯ୍ୟନ୍ତ ଏହି ଦିଗରେ କୌଣସି ଅନୁପାଳନ ରିପୋର୍ଟ ପ୍ରାପ୍ତ ହୋଇନାହିଁ, ତେଣୁ ପୁନର୍ବାର ଅନୁପାଳନ ସ୍ଥିତି ଦାଖଲ କରିବାକୁ ସୋମବାର ପ୍ରଦୂଷଣ ନିୟନ୍ତ୍ରଣ ବୋର୍ଡ ବିଏମସି କମିଶନରଙ୍କୁ ଚିଠି କରିଛି । ସଠିକ ଓ ସନ୍ତୋଷ ଜନକ ଉତ୍ତର ନିର୍ଦ୍ଧାରିତ ସମୟ ଭିତରେ ନଦେଲେ ଉପଯୁକ୍ତ ବିବେଚିତ କାର୍ଯ୍ୟାନୁଷ୍ଠାନ ନିଆଯିବ ବୋଲି ବୋର୍ଡ ଜଣାଇଛି । ତତସହିତ ମଙ୍ଗଳବାର ଗକ୍ଷଡକଣ ଅଳିଆ ଗଦା ଓ ଟିଟିଏସର ସ୍ଥିତି ସମୀକ୍ଷା ଓ ଯାଞ୍ଚ କରାଯିବ । ଯାଞ୍ଚ ସମୟରେ ଦାୟିତ୍ୱରେ ଥିବା ଅଧିକାରୀ ଉପସ୍ଥିତ ରହି ଆବଶ୍ୟକୀୟ ଦସ୍ତାବିଜ ସହ ସମସ୍ତ ଅନୁଧ୍ୟାନରେ ସହଯୋଗ ପାଇଁ ନିର୍ଦ୍ଦେଶ ଦେଇଛି । ପ୍ରଦୂଷଣ ବୋର୍ଡର ଏହି ପଦକ୍ଷେପକୁ ଆବାହକ ଭିକ୍ଷାକାରୀ ତ୍ରିପାଠୀ, ବାସୁଦେବ ଭଟ୍ଟ, ପ୍ରସନ୍ନ ବିଷୋୟୀ ଅଶୋକ ପାଇକରାୟ ସ୍ୱାଗତ କରିବା ସହିତ ବିଏମସି ବେଆଇନ ଅଳିଆଗଦା ହଟାଇ ଲୋକଙ୍କୁ ହିନସ୍ଥା କରିବାରୁ କ୍ଷାନ୍ତ ରହୁ ନଚେତ ଦୁର୍ବାର ଆନ୍ଦୋଳନ ହେବ ବୋଲି କହିଛନ୍ତି ।
