ଭୁବନେଶ୍ୱର, 17/7: ଓଡ଼ିଶାର ରେଳ ଭିତ୍ତିଭୂମିକୁ ମଜବୁତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇ କେନ୍ଦ୍ର ରେଳ ମନ୍ତ୍ରଣାଳୟ ରାଣୀତାଳ ଲିଙ୍କ କେବିନ୍ ଓ ଭଦ୍ରକ ଷ୍ଟେସନ ମଧ୍ୟରେ ୫.୦୬ କିଲୋମିଟର ଦୈର୍ଘ୍ୟର ଚତୁର୍ଥ ରେଳ ଲାଇନ ନିର୍ମାଣ ପାଇଁ ଅନୁମୋଦନ ଦେଇଛି । ଏହି ପ୍ରକଳ୍ପର ଆନୁମାନିକ ଖର୍ଚ୍ଚ ହେଉଛି ୧୪୯.୩୨ କୋଟି ଟଙ୍କା । ଏହି ପ୍ରମୁଖ ପ୍ରକଳ୍ପ ହାୱାଡା-ଚେନ୍ନାଇ ମୁଖ୍ୟ ରେଳ ଲାଇନରେ ଟ୍ରେନ୍ ପରିଚାଳନାର କ୍ଷମତା ଓ ଦକ୍ଷତାକୁ ନାଟକୀୟ ଭାବେ ବୃଦ୍ଧି କରିବ ବୋଲି ଆଶା କରାଯାଉଛି । ଏହା ଧାମରା ଓ ପାରାଦୀପ ବନ୍ଦରଗୁଡ଼ିକ ସହ ମାଲବାହୀ ସଂଯୋଗକୁ ମଜବୁତ କରିବ । ରାଣୀତାଳ ଲିଙ୍କ କେବିନ୍-ଭଦ୍ରକ ସେକ୍ସନ ହାୱାଡା-ଚେନ୍ନାଇ ହାଇ-ଡେନ୍ସିଟି ନେଟୱାର୍କ (ଏଚଡିଏନ)ର ଏକ ଅଂଶ, ଯାହା ଭାରତର ସବୁଠାରୁ ବ୍ୟସ୍ତ ରେଳ କରିଡର ମଧ୍ୟରୁ ଅନ୍ୟତମ । ଚତୁର୍ଥ ରେଳ ଲାଇନର ସଂଯୋଜନ ମୁଖ୍ୟ ଲାଇନରୁ ବନ୍ଦରମୁଖୀ ମାଲବାହୀ ଟ୍ରାଫିକକୁ ଡାଇଭର୍ଟ କରି ଏହି କରିଡରରେ ଭିଡ଼କୁ ହ୍ରାସ କରିବ । ଏହା ଯାତ୍ରୀ ଓ ମେଲ/ଏକ୍ସପ୍ରେସ ଟ୍ରେନଗୁଡ଼ିକର ଅଧିକ ସମୟାନୁବର୍ତ୍ତୀ ଓ ଦ୍ରୁତ ପରି·ଳନା ସୁନିଶ୍ଚିତ କରିବ ଏବଂ ଖଡ଼ଗପୁର ଓ ଭୁବନେଶ୍ୱର ମଧ୍ୟରେ ତଥା ତା’ପରେ ମଧ୍ୟ କୋଚିଂ ଟ୍ରେନ ଗୁଡ଼ିକର ସୁଗମ ଗତିବିଧିରେ ସହାୟକ ହେବ । ବର୍ତ୍ତମାନ ଏହି ସେକ୍ସନରେ ଅତ୍ୟଧିକ ଭିଡ଼ ଯୋଗୁଁ ଟ୍ରେନ ଗୁଡ଼ିକ ବାରମ୍ବାର ବିଳମ୍ବର ସମ୍ମୁଖୀନ ହେଉଛି । ପ୍ରକଳ୍ପ ସମ୍ପୂର୍ଣ୍ଣ ହେଲେ ପରିଚାଳନାଗତ ବାଧା ଦୂର ହେବ ଏବଂ ଯାତ୍ରୀମାନଙ୍କ ପାଇଁ ଅଧିକ ନିର୍ଭରଯୋଗ୍ୟ ଓ ସମୟାନୁବର୍ତ୍ତୀ ଟ୍ରେନ ସୂଚୀ ମିଳିବ । ଏହି ପ୍ରକଳ୍ପ ମାଲବାହୀ ଓ କୋଚିଂ ଟ୍ରାଫିକକୁ ଅଲଗା କରିବାରେ ସାହାଯ୍ୟ କରିବ, ଯାହା ବିଳମ୍ବକୁ ହ୍ରାସ କରି ରୁଟର ସାମଗ୍ରିକ ଦକ୍ଷତା ବୃଦ୍ଧି କରିବ । ବର୍ଦ୍ଧିତ ଲାଇନ କ୍ଷମତା ସହ ଏହି ନେଟୱାର୍କ ଅଞ୍ଚଳରେ ବୃଦ୍ଧି ପାଉଥିବା ଟ୍ରାଫିକ ପରିମାଣକୁ ନିୟନ୍ତ୍ରଣ କରିବାରେ ସକ୍ଷମ ହେବ । ଏହା ପୂର୍ବତଟ ରେଳବାଇର ଚାଲୁଥିବା ପ୍ରୟାସର ଏକ ଅଂଶ, ଯାହା ଓଡ଼ିଶାର ଜନସାଧାରଣଙ୍କ ପାଇଁ ଏକ ବିଶ୍ୱସ୍ତରୀୟ ରେଳ ନେଟୱାର୍କ ବିକାଶ ଓ ଆଧୁନିକୀକରଣ ଲକ୍ଷ୍ୟରେ କାର୍ଯ୍ୟ କରୁଛି ।
