ନୂଆଦିଲ୍ଲୀ, ୨ା୬ : ଭାରତ ଏବଂ ପାରାଗୁଏ ସ୍ୱଚ୍ଛ ଶକ୍ତି, ସବୁଜ ହାଇଡ୍ରୋଜେନ ଏବଂ ଜୈବ ଇନ୍ଧନ ଭଳି କ୍ଷେତ୍ରରେ ସେମାନଙ୍କର ସମ୍ପର୍କକୁ ଆହୁରି ମଜବୁତ କରିବାକୁ ନିଷ୍ପତ୍ତି ନେଇଛନ୍ତି । ସୋମବାର ନୂଆଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ପାରାଗୁଏ ରାଷ୍ଟ୍ରପତି ସାଣ୍ଟିଆଗୋ ପେନା ପାଲାସିଓସଙ୍କ ମଧ୍ୟରେ ଅନୁଷ୍ଠିତ ପ୍ରତିନିଧିସ୍ତରୀୟ ଆଲୋଚନା ସମୟରେ ଏହି ନିଷ୍ପତ୍ତି ନିଆଯାଇଛି । ଉଭୟ ଦେଶ ସାଇବର ଅପରାଧ, ସଂଗଠିତ ଅପରାଧ, ନିଶା କାରବାରରକୁ ଦୂର କରିବା ପାଇଁ ସେମାନଙ୍କର ପ୍ରତିବଦ୍ଧତା ମଧ୍ୟ ପ୍ରକାଶ କରିଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ଭାରତ ଏବଂ ପାରାଗୁଏ ଆତଙ୍କବାଦ ବିରୁଦ୍ଧରେ ଲଢ଼େଇରେ ଏକାଠି ଅଛନ୍ତି । ଶ୍ରୀ ମୋଦି କହିଛନ୍ତି, ଡିଜିଟାଲ ପ୍ରଯୁକ୍ତିବିଦ୍ୟା, କୃଷି, ପ୍ରତିରକ୍ଷା, ରେଳବାଇ, ମହାକାଶ ସମେତ ଅନ୍ୟାନ୍ୟ କ୍ଷେତ୍ରରେ ଉଭୟ ଦେଶ ପାଖରେ ଅନେକ ସମ୍ଭାବ୍ୟ ସୁଯୋଗ ରହିଛି । ସେ କହିଛନ୍ତି, ପାରାଗୁଏ ଦକ୍ଷିଣ ଆମେରିକାର ଏକ ମୂଲ୍ୟବାନ ଅଂଶୀଦାର ଏବଂ ଉଭୟ ରାଷ୍ଟ୍ର ସମାନ ମୂଲ୍ୟବୋଧ ଦ୍ୱାରା ଜଡିତ । ସେ କହିଛନ୍ତି, ବାଣିଜ୍ୟ ସମ୍ପର୍କ ବୃଦ୍ଧି କରିବାରେ ଅପାର ସମ୍ଭାବନା ରହିଛି । ପୂର୍ବରୁ, ବୈଦେଶିକ ମନ୍ତ୍ରୀ ଡକ୍ଟର ଏସ ଜୟଶଙ୍କର ମଧ୍ୟ ରାଷ୍ଟ୍ରପତି ପାଲାସିଓସଙ୍କୁ ଭେଟି ଭାରତ-ପାରାଗୁଏ ସହଯୋଗ ବୃଦ୍ଧି ପାଇଁ ତାଙ୍କର ସକାରାତ୍ମକ ଭାବନା ଏବଂ ମାର୍ଗଦର୍ଶନକୁ ପ୍ରଶଂସା କରିଥିଲେ । ଦୁଇ ରାଷ୍ଟ୍ର ମଧ୍ୟରେ ମିଳିତ କମିଶନ ମେଣ୍ଟ ପ୍ରତିଷ୍ଠା ପାଇଁ ଭାରତ ଏବଂ ପାରାଗୁଏ ମଧ୍ୟରେ ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଥିଲା । ଶ୍ରୀ ପାଲାସିଓସ୍ ତିନି ଦିନିଆ ଭାରତ ଗସ୍ତରେ ଅଛନ୍ତି । ରାଷ୍ଟ୍ରପତି ରାଜଘାଟ ଗସ୍ତ କରି ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ଉପରାଷ୍ଟ୍ରପତି ଜଗଦୀପ ଧନକରଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି । ରାଷ୍ଟ୍ରପତି ପେନା ବୁଧବାର ପାରାଗୁଏ ଫେରିବା ପୂର୍ବରୁ ମୁମ୍ବାଇ ମଧ୍ୟ ଯିବେ । ମୁମ୍ବାଇରେ ସେ ରାଜ୍ୟ ନେତା, ବ୍ୟବସାୟ ଏବଂ ଶିଳ୍ପ ପ୍ରତିନିଧି ଏବଂ ଟେକ୍ନୋଲୋଜି ବିଶେଷଜ୍ଞମାନଙ୍କୁ ଭେଟିବେ । ଭାରତ ଏବଂ ପାରାଗୁଏ ୧୯୬୧ ମସିହାରେ କୂଟନୈତିକ ସମ୍ପର୍କ ସ୍ଥାପନ କରିଥିଲେ, ଯାହା ଦଶନ୍ଧି ଧରି ଦୁଇ ଦେଶ ମଧ୍ୟରେ ଉଷ୍ମ ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କ ବୃଦ୍ଧି କରିଥିଲା । ଦୁଇ ଦେଶ ବାଣିଜ୍ୟ, କୃଷି, ସ୍ୱାସ୍ଥ୍ୟ, ଔଷଧ ଏବଂ ସୂଚନା ପ୍ରଯୁକ୍ତିବିଦ୍ୟା ସମେତ ବିଭିନ୍ନ କ୍ଷେତ୍ରରେ ସହଯୋଗ ବିକଶିତ କରିଛନ୍ତି । ପାରାଗୁଏ ଲାଟିନ୍ ଆମେରିକୀୟ କ୍ଷେତ୍ରରେ ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ବାଣିଜ୍ୟିକ ଅଂଶୀଦାର । ଅଟୋ-ମୋବାଇଲ୍ ଏବଂ ଔଷଧ କ୍ଷେତ୍ରରେ ଅନେକ ଭାରତୀୟ କମ୍ପାନୀ ପାରାଗୁଏରେ ଉପସ୍ଥିତ ଅଛନ୍ତି । ପାରାଗୁଏ କମ୍ପାନୀଗୁଡ଼ିକ ମଧ୍ୟ ଭାରତରେ ଉପସ୍ଥିତ ଅଛନ୍ତି, ଯାହା ଦୁଇ ରାଷ୍ଟ୍ର ମଧ୍ୟରେ ଆର୍ଥିକ ସମ୍ପର୍କରେ ଅବଦାନ ରଖିଛି । ଦୁଇ ଦେଶ ଜାତିସଂଘ ସଂସ୍କାର, ଜଳବାୟୁ ପରିବର୍ତ୍ତନ, ନବୀକରଣୀୟ ଶକ୍ତି ଏବଂ ଆତଙ୍କବାଦ ମୁକାବିଲା ସମେତ ବିଭିନ୍ନ ଆନ୍ତର୍ଜାତୀୟ ପ୍ରସଙ୍ଗରେ ସମାନ ମତ ରଖିଛନ୍ତି ।
