ମୁମ୍ବାଇ,: ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ରେପୋ ରେଟ୍କୁ ୫୦ ବେସିସ ପଏଣ୍ଟ ହ୍ରାସ କରିଛି । ଏହି ନିଷ୍ପତ୍ତି ଆରବିଆଇ ଗଭର୍ଣ୍ଣର ସଞ୍ଜୟ ମଲହୋତ୍ରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଦ୍ୱି-ମାସିକ ମୁଦ୍ରା ନୀତି କମିଟି (ଏମପିସି) ବୈଠକରେ ସର୍ବସମ୍ମତି କ୍ରମେ ନିଆଯାଇଛି । ଏହି ହ୍ରାସ ପରେ ରେପୋରେଟ୍ ଏବେ ପୂର୍ବର ୬.୫%ରୁ ୬.୦%କୁ ଖସି ଆସିଛି । ଯାହା ବ୍ୟାଙ୍କଗୁଡ଼ିକୁ ଅଧିକ ଶସ୍ତାରେ ଋଣ ପ୍ରଦାନ କରିବା ପାଇଁ ସୁଯୋଗ ଦେବ । ଆର୍ବିଆଇ କହିଛି ଯେ, ଏହି ହ୍ରାସ ଅର୍ଥନୀତିରେ ଚାହିଦା ବଢ଼ାଇବା ଏବଂ ଆର୍ଥିକ ପ୍ରବୃଦ୍ଧିକୁ ଉତ୍ସାହିତ କରିବା ପାଇଁ କରାଯାଇଛି । ସାମ୍ପ୍ରତିକ ଅର୍ଥନୈତିକ ତଥ୍ୟ ଅନୁସାରେ, ଭାରତର ଅର୍ଥନୀତି ମନ୍ଥର ଗତିରେ ଆଗେଇଛି । ଯେଉଁଥିରେ ବିନିଯୋଗ ଓ ଗ୍ରାହକ ଖର୍ଚ୍ଚରେ ହ୍ରାସ ଦେଖାଯାଇଛି । ଏହା ସହିତ, ମୁଦ୍ରାସ୍ଫୀତି ହାର ୪% ମଧ୍ୟରେ ରହିଥିବାରୁ ଆର୍ବିଆଇକୁ ରେପୋରେଟ୍ ହ୍ରାସ କରିବା ପାଇଁ ସୁଯୋଗ ମିଳିଛି । ଗଭର୍ଣ୍ଣର ମଲହୋତ୍ରା କହିଛନ୍ତି, ଅର୍ଥନୀତିକୁ ପୁନରଜନ୍ମ ଦେବା ଏବଂ
କର୍ମସଂସ୍ଥାନ ସୃଷ୍ଟି ପାଇଁ ଏହା ଏକ ଆବଶ୍ୟକ ପଦକ୍ଷେପ । ଏହି ରେପୋରେଟ୍ ହ୍ରାସ ବ୍ୟାଙ୍କଗୁଡ଼ିକୁ ଆର୍ବିଆଇ ଠାରୁ ଶସ୍ତା ଋଣ ପାଇବାରେ ସାହାଯ୍ୟ କରିବ, ଯାହା ଗ୍ରାହକଙ୍କ ପାଇଁ ଗୃହ ଋଣ, ଗାଡ଼ି ଋଣ ଏବଂ ବ୍ୟକ୍ତିଗତ ଋଣର ସୁଧ ହାରକୁ ହ୍ରାସ କରିପାରେ । ଏହା ବ୍ୟବସାୟୀମାନଙ୍କ ପାଇଁ ମଧ୍ୟ ଅଧିକ ଶସ୍ତା ଋଣ ଉପଲବ୍ଧ କରାଇବ, ଯାହା ବିନିଯୋଗ ଓ ଉତ୍ପାଦନକୁ ଉତ୍ସାହିତ କରିପାରେ । ତେବେ, କେତେକ ବିଶ୍ଲେଷକ ଚେତାବନୀ ଦେଇଛନ୍ତି ଯେ, ଅତ୍ୟଧିକ ଋଣ ଉପଲବ୍ଧତା ମୁଦ୍ରାସ୍ଫୀତିକୁ ବଢ଼ାଇ ପାରେ, ଯାହା ଆଗାମୀ ଦିନରେ ଆର୍ବିଆଇ ପାଇଁ ଚ୍ୟାଲେଞ୍ଜ ହେବ । ଜଣେ ଅର୍ଥନୀତିବିତ ଏକ୍ସରେ ଲେଖିଛନ୍ତି, ରେପୋ ରେଟ୍ ହ୍ରାସ ଅର୍ଥନୀତିକୁ ଉତ୍ସାହିତ କରିବ, କିନ୍ତୁ ମୁଦ୍ରାସ୍ଫୀତି ଓ ଋଣ ପରିଚାଳନା ଉପରେ ନଜର ରଖିବା ଆବଶ୍ୟକ ।
