ଭୂମି ପୂଜା ସମ୍ପନ୍ନ, ଶିଳାନ୍ୟାସ କଲେ ପ୍ରଧାନମନ୍ତ୍ରୀ

ଅଯୋଧ୍ୟା: ଅଯୋଧ୍ୟାରେ ରାମ ମନ୍ଦିରର ଭୂମି ପୂଜନ ଶେଷ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମନ୍ଦିରର ଶିଳାନ୍ୟାସ କରିଛନ୍ତି। ଏହି ଅବସରରେ ସାରା ପ୍ରୟାଗରାଜ ରାମମୟ ହୋଇପଡ଼ିଥିଲା। ଚାରିଆଡ଼ ଜୟ ଶ୍ରୀରାମ ଧ୍ଵନିରେ ପ୍ରକମ୍ପିତ ହୋଇପଡ଼ିଥିଲା। ସହରର ଅନ୍ୟାନ୍ୟ ମନ୍ଦିରଗୁଡ଼ିକୁ ଫୁଲ ଏବଂ ଆଲୋକମାଳାରେ ସୁସଜ୍ଜିତ କରାଯାଇଛି।

ଭୂମି ପୂଜା ଉତ୍ସବରେ ବହୁ ଅତିଥି ସାମିଲ ହୋଇଥିଲେ। ଆରଏସଏସ ମୁଖ୍ୟ ମୋହନ ଭାଗବତ, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପ୍ରମୁଖ ଉପସ୍ଥିତ ରହିଥିଲେ।

ଭୂମି ପୂଜନ ପରେ ପୂଜାରି କହିଛନ୍ତି, ଏଠାରେ ୯ଟି ଇଟା ରଖାଯାଇଛି। ୧୯୮୯ରେ ବିଶ୍ଵବ୍ୟାପୀ ଭଗବାନ ରାମଙ୍କ ଭକ୍ତମାନେ ଏହି ଇଟାକୁ ପଠାଇଥିଲେ। ଏହିପରି ୨ ଲକ୍ଷ ୭୫ ହଜାର ଇଟା ରହିଛି। ସେଥିରୁ ୧୦୦ଟି ଇଟାରେ ଜୟ ଶ୍ରୀରାମ ଲେଖାଯାଇଛି। ଭୂମି ପୂଜନରେ ସ୍ଥାପନ ହୋଇଥିବା ୯ଟି ଇଟା ମଧ୍ୟରୁ ମଝିରେ ରହିଥିବା ଇଟାର ନାମ ହେଉଛି କୂର୍ମ ଶିଳା। ଏହି ଶିଳାର ଠିକ୍‌ ଉପରେ ରାମ ଲାଲା ବରାଜିତ ହେବେ।

ସନ୍ଧ୍ୟାରେ ଘରେ ଘରେ ଜଳିବ ଦୀପ

୪୯୨ ବର୍ଷର ପ୍ରତୀକ୍ଷା ପରେ ଅଯୋଧ୍ୟାରେ ରାମ ମନ୍ଦିରର ଭୂମି ପୂଜନ ହୋଇଛି। ଏହାକୁ ନେଇ ଆରଏସଏସ, ବିଶ୍ବ ହିନ୍ଦୁ ପରିଷଦ ଏବଂ ବିଜେପି କର୍ମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ସହରର ସମସ୍ତ ମନ୍ଦିରକୁ ସଜାଯାଇଛି। ସନ୍ଧ୍ୟାରେ ଘରେ ଘରେ ଦୀପ ଜାଳିବାକୁ ଲୋକଙ୍କୁ ଅନୁରୋଧ କରାଯାଇଛି।