ନୂଆଦିଲ୍ଲୀ,: ଭାରତର ବୈଦେଶିକ ମନ୍ତ୍ରୀ ଏସ୍.ଜୟଶଙ୍କର ଆସନ୍ତା ଅଗଷ୍ଟ ୨୦ ଓ ୨୧ ତାରିଖରେ ରୁଷକୁ ଦୁଇ ଦିନିଆ ଗସ୍ତରେ ଯିବେ । ଏହି ଗସ୍ତରେ ସେ ରୁଷର ବୈଦେଶିକ ମନ୍ତ୍ରୀ ସେର୍ଗେଇ ଲାଭ୍ରୋଭଙ୍କ ସହ ଆଲୋଚନା କରିବେ । ଏହା ଏକ ଗୁରୁତ୍ୱପୂର୍ଣ୍ଣ ଘଟଣା କାରଣ ଏହା ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଭାରତୀୟ ସାମଗ୍ରୀ ଉପରେ ୨୫% ଅତିରିକ୍ତ ଶୁଳ୍କ ଲଗାଯିବା ପରେ ହେଉଛି । ଯାହା ଭାରତର ରୁଷରୁ ତୈଳ କ୍ରୟ ଜାରି ରଖିବା ପାଇଁ ଏକ ପ୍ରତିକ୍ରିୟା ଭାବେ ଦେଖାଯାଉଛି । ଟ୍ରମ୍ପଙ୍କ ଏହି ଶୁଳ୍କ ନିଷ୍ପତ୍ତି ଅଗଷ୍ଟ ୬ ତାରିଖରେ ଏକ କାର୍ଯ୍ୟକାରୀ ଆଦେଶ ମାଧ୍ୟମରେ ଘୋଷଣା କରାଯାଇଥିଲା । ଯାହା ଅନୁଯାୟୀ ଭାରତୀୟ ସାମଗ୍ରୀ ଉପରେ ମୋଟ ୫୦% ଶୁଳ୍କ ଲାଗୁ ହେବ । ଏହି ଶୁଳ୍କ ଦୁଇ ପର୍ଯ୍ୟାୟରେ କାର୍ଯ୍ୟକାରୀ ହେବ, ପ୍ରଥମ ୨୫% ଅଗଷ୍ଟ ୭ ତାରିଖରୁ ଲାଗୁ ହୋଇଥିଲା ବେଳେ ଆଲୋଚନା ମାଧ୍ୟମରେ କୌଣସି ସମାଧାନ ନହେଲେ ଅବଶିଷ୍ଟ ୨୫% ଆସନ୍ତା ଅଗଷ୍ଟ ୨୮ ତାରିଖରୁ ଲାଗୁ ହେବାର ଯୋଜନା ରହିଛି । ଏହି ପରିପ୍ରେକ୍ଷୀରେ ଜୟଶଙ୍କରଙ୍କ ରୁଷ ଗସ୍ତ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନ କରାଯାଉଛି । ଏହା ପୂର୍ବରୁ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ମଧ୍ୟ ରୁଷରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ପୁଟିନଙ୍କ ସହ ଟେଲିଫୋନ ମାଧ୍ୟମରେ ଆଲୋଚନା କରି ରୁଷୟୁକ୍ରେନ ସଂଘର୍ଷରେ ଶାନ୍ତିପୂର୍ଣ୍ଣ ସମାଧାନ ପାଇଁ ଭାରତର ସ୍ଥିତି ପୁନଃବ୍ୟକ୍ତ କରିଥିଲେ । ଭାରତୀୟ ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଆମେରିକାର ଏହି ଶୁଳ୍କକୁ ଅନ୍ୟାୟ, ଅଯୌକ୍ତିକ ଏବଂ ଅସଙ୍ଗତ ବୋଲି କହି ନିନ୍ଦା କରିଛନ୍ତି । ଏବଂ ଭାରତ ନିଜର ଅର୍ଥନୈତିକ ସାର୍ବଭୌମତ୍ୱ ରକ୍ଷା ପାଇଁ ସମସ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବ ବୋଲି ଚେତାବନୀ ଦେଇଛନ୍ତି । ଏହା ସହିତ, ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନ ୨୦୨୫ ଶେଷ
ସୁଦ୍ଧା, ସମ୍ଭବତଃ ଅକ୍ଟୋବରରେ ଭାରତ ଗସ୍ତ କରିବାର ସମ୍ଭାବନା ରହିଛି । ଏହା ରୁଷ-ୟୁକ୍ରେନ ସଂଘର୍ଷ ଆରମ୍ଭ ହେବା ପରେ ପୁଟିନଙ୍କର ପ୍ରଥମ ଭାରତ ଗସ୍ତ ହେବ । ଏହି ଗସ୍ତ ଏବଂ ଆଲୋଚନା ଭାରତ-ରୁଷ ସମ୍ପର୍କକୁ ଆହୁରି ମଜବୁତ କରିବା ସହ ବୈଶ୍ୱିକ ଅର୍ଥନୈତିକ ଏବଂ ରାଜନୈତିକ ପରିସ୍ଥିତିରେ ଭାରତର ସ୍ଥିତିକୁ ସୁଦୃଢ଼ କରିବ ବୋଲି ଆଶା କରାଯାଉଛି ।
