ପ୍ରଧାନମନ୍ତ୍ରୀ ଆୱାସ ଯୋଜନା କେବଳ ଘର ନିର୍ମାଣ ନୁହେଁ ବରଂ ଗରିବ ଲୋକଙ୍କୁ ସଶକ୍ତ କରିବାର ଲକ୍ଷ୍ୟ ରଖିଛି : ମୋଦି

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ପ୍ରଧାନମନ୍ତ୍ରୀ ଆୱାସ ଯୋଜନା ଅଧୀନରେ ନିର୍ମିତ ମଧ୍ୟପ୍ରଦେଶରେ ୧.୭୫ ଲକ୍ଷ ଘର ଉଦ୍ଘାଟନ କରିଛନ୍ତି । ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପ୍ରଧାନମନ୍ତ୍ରୀ ଆୱାସ ଯୋଜନା କେବଳ ଘର ନିର୍ମାଣ ନୁହେଁ, ଏହା ଆତ୍ମବିଶ୍ୱାସ ବଢ଼ାଇବା ଏବଂ ଗରିବ ଲୋକଙ୍କୁ ସଶକ୍ତ କରିବା ବିଷୟରେ । ଭିଡିଓ କନଫରେନ୍ସିଂ ଜରିଆରେ ପ୍ରଧାନମନ୍ତ୍ରୀ ମୋଦୀ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ ଏବଂ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ ମଧ୍ୟ ତାଙ୍କ ସହ ଯୋଗ ଦେଇଥିଲେ । ସେ କହିଛନ୍ତି ଯେ ଭାରତ ସରକାରଙ୍କ ଫ୍ଲାଗସିପ୍ ପ୍ରଧାନମନ୍ତ୍ରୀ ଆୱାସ ଯୋଜନା ଦୂର ଗ୍ରାମରେ ଅନେକ ଭୂମିହୀନ ପରିବାରର ଜୀବନକୁ ପରିବର୍ତ୍ତନ କରିଛି । ମଧ୍ୟପ୍ରଦେଶରେ ଏହି ଯୋଜନା ଅଧୀନରେ ୧,୭୫,୦୦୦ ଘର ନିର୍ମାଣ କରାଯାଇଛି । ତାଙ୍କ ସରକାରଙ୍କ ସଫଳତାକୁ ଆଲୋକିତ କରି ପ୍ରଧାନମନ୍ତ୍ରୀ କହିଛନ୍ତି ଯେ କରୋନାଭାଇରସ୍ ମହାମାରୀ ସମୟରେ ମଧ୍ୟ ପିଏମ୍ଏୱାଇ ଅଧୀନରେ ଘରଗୁଡିକ ୪୫ ରୁ ୬୦ ଦିନ ମଧ୍ୟରେ ନିର୍ମାଣ କରାଯାଇଥିଲା ଯାହା ବିପର୍ଯ୍ୟୟକୁ ଏକ ସୁଯୋଗରେ ପରିଣତ କରିବାର ଏକ ଉତ୍ତମ ଉଦାହରଣ ଅଟେ । ସେ ଆହୁରି ମଧ୍ୟ କହିଛନ୍ତି ଯେ ପୂର୍ବରୁ ଗରିବମାନେ ସେମାନଙ୍କ କାର୍ଯ୍ୟ ଶେଷ କରିବା ପାଇଁ ସରକାରଙ୍କ ପଛରେ ଦୌଡ଼ୁଥିଲେ । ବର୍ତ୍ତମାନ ପରିସ୍ଥିତି ଏହାର ବିପରୀତ ଅଟେ । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଭାରତର ଅର୍ଥନୀତିକୁ ବୃଦ୍ଧି କରିବା ଏବଂ ଭାରତକୁ ଆତ୍ମନିର୍ଭରଶୀଳ କରିବା ପାଇଁ ର୍ନିମାଣ ଏବଂ ଉତ୍ପାଦନ ପ୍ରକଳ୍ପରେ ସ୍ଥାନୀୟ ସାମଗ୍ରୀର ବ୍ୟବହାର ସରକାର ନିଶ୍ଚିତ କରୁଛନ୍ତି ।

Leave a Reply

Your email address will not be published. Required fields are marked *