ନୂଆଦିଲ୍ଲୀ, ୨୨ ।୯ : ରାଜ୍ୟସଭାର ନିଲମ୍ବିତ ସମସ୍ତ ସାଂସଦ ସେମାନଙ୍କର ବିକ୍ଷୋଭ ପ୍ରଦର୍ଶନ ଶେଷ କରିଛନ୍ତି । ଏହା ସହ କଂଗ୍ରେସ ସମଗ୍ର ମୌସୁମୀ ଅଧିବେଶନକୁ ବହିଷ୍କାର କରିବା ଘୋଷଣା କରିଛି । କଂଗ୍ରେସର ରାଜ୍ୟସଭା ସଦସ୍ୟମାନେ ରାଜ୍ୟସଭାରୁ ୱାକ୍ଆଉଟ୍ କରିଛନ୍ତି । କଂଗ୍ରେସ ବ୍ୟତୀତ ସମାଜବାଦୀ ପାର୍ଟି (ଏସପି), ଜାତୀୟତାବାଦୀ କଂଗ୍ରେସ ପାର୍ଟି (ଏନସିପି), ଡିଏମକେ, ତୃଣମୂଳ କଂଗ୍ରେସ (ଟିଏମସି), ଆମ୍ ଆଦମୀ ପାର୍ଟି (ଏଏପି), ବାମ, ଆରଜେଡି, ଟିଆରଏସ ଏବଂ ବିଏସପି ଏହି ପ୍ରକ୍ରିୟାକୁ ପ୍ରତ୍ୟାଖାନ କରିଛନ୍ତି । ସୂଚନାଯୋଗ୍ୟ ଏହି ସାଂସଦମାନେ ୨୦ ସେପ୍ଟେମ୍ବରରେ କୃଷକଙ୍କ ସହ ଜଡିତ ବିଲ୍ ପାସ୍ କରୁଥିବାବେଳେ ହଙ୍ଗାମା ସୃଷ୍ଟି କରିଥିଲେ । ଏହାପରେ ସୋମବାର ସଭାପତି ଭେଙ୍କୟା ନାଇଡୁ ସମଗ୍ର ଅଧିବେଶନ ପାଇଁ ୮ଜଣ ସାଂସଦଙ୍କୁ ନିଲମ୍ବିତ କରିଛନ୍ତି । ପରେ ସମସ୍ତ ସାଂସଦ ସଂସଦ ପରିସରରେ ଧର୍ମଘଟରେ ବସିଥିଲେ । ବାଚସ୍ପତି ଭେଙ୍କୟା ନାଇଡୁ, ତୃଣମୂଳ କଂଗ୍ରେସର ଡେରେକ ଓ’ବ୍ରାଇନ୍ ଏବଂ ଡୋଲା ସେନ୍, କଂଗ୍ରେସର ରାଜୀବ ସାତବ, ରିପୁନ୍ ବୋରା, ନାସିର ହୁସେନ୍, ଆମ୍ ଆଦମୀ ପାର୍ଟିର ସଞ୍ଜୟ ସିଂ, କେକେ ରାଗେଶ ଓ ମାର୍କ୍ସବାଦୀ କମ୍ୟୁନିଷ୍ଟ ପାର୍ଟିର କେଇ କରିମଙ୍କୁ ପୂରା ସଂସଦୀୟ ଅଧିବେଶନ ପାଇଁ ନିଲମ୍ବିତ କରିଦିଆଯାଇଛି । ଏହାର ପ୍ରତିବାଦରେ ସମସ୍ତ ସାଂସଦ ଗାନ୍ଧୀ ମୂର୍ତ୍ତି ନିକଟରେ ବସି ଧାରଣା ଦେଇଥିଲେ ଓ ପୂରା ରାତି ସଂସଦ ପରିସରରେ କାଟିଥିଲେ । ମଙ୍ଗଳବାର ସକାଳେ ରାଜ୍ୟସଭାର ପ୍ରକ୍ରିୟା ଆରମ୍ଭ ହେବା ମାତ୍ରେ କଂଗ୍ରେସ ଏହି ପ୍ରସଙ୍ଗ ଉଠାଇଥିଲା । କଂଗ୍ରେସ ସାଂସଦ ଗୁଲାମ ନବୀ ଆଜାଦ କହିଥିଲେ ଯେ ଯେପର୍ଯ୍ୟନ୍ତ ଆମର ସାଂସଦଙ୍କ ନିଲମ୍ବନ ପ୍ରତ୍ୟାହାର କରାନଯାଇଛି ଏବଂ କୃଷକଙ୍କ ବିଲ୍ ସହ ଜଡିତ ଆମର ଦାବିକୁ ବିଚାର କରାଯାଇ ନାହିଁ, ବିରୋଧୀ ଅଧିବେଶନରୁ ପ୍ରତ୍ୟାଖାନ କରିବେ । ଏହା ପରେ ସମାଜବାଦୀ ପାର୍ଟିର ସାଂସଦ ରାମ ଗୋପାଳ ଯାଦବ କହିଛନ୍ତି ଯେ ମୁଁ କେବଳ ସାଂସଦମାନଙ୍କୁ ଗୃହକୁ ଫେରିବା ପାଇଁ ଦାବି କରିନାହିଁ ବରଂ ମୁଁ ବିରୋଧୀଙ୍କଠାରୁ କ୍ଷମା ପ୍ରାର୍ଥନା କରିଛି । କିନ୍ତୁ ମୋର କ୍ଷମା ପ୍ରାର୍ଥନା ବଦଳରେ କୌଣସି ପ୍ରତିକ୍ରିୟା ଦିଆଯାଇ ନାହିଁ । ଏହା ମୋତେ ବହୁତ ବିବ୍ରତ କଲା । ସେଥିପାଇଁ ମୁଁ ଏବଂ ମୋର ପୁରା ଦଳ ସଂସଦର ଏହି ପୁରା ଅଧିବେଶନକୁ ବହିଷ୍କାର କରୁଛୁ । ଏଥିସହ ପୂର୍ବତନ ପ୍ରଧାନମନ୍ତ୍ରୀ ତଥା ରାଜ୍ୟସଭା ସଦସ୍ୟ ଏଚଡି ଦେବେ ଗୌଡା କହିଛନ୍ତି ଯେ ଉଭୟ ବିରୋଧୀ ଓ ସରକାର ଏକାଠି ବସି ଗୃହ ଚଳାଇବାରେ ସାହାଯ୍ୟ କରିବା ଉଚିତ । ପରସ୍ପରର ସହଯୋଗରେ ଗଣତନ୍ତ୍ର ଜାରି ରଖିବା ଉଚିତ୍ ।
