କୁମ୍ଭ କର୍ଣ୍ଣ ନିଦ୍ରା ରେ ବାଲିଗୁଡା ବନଖଣ୍ଡ ଅଧିକାରୀ
ଫୁଲବାଣୀ : କନ୍ଧମାଳ ଜିଲ୍ଲା ବାଲିଗୁଡ଼ା ବନଖଣ୍ଡ ଅନ୍ତର୍ଗତ ବିଭିନ୍ନ ରେଞ୍ଜ ରେ ଶହ ଶହ ଏକର ଜଙ୍ଗଲ ଜମି ରେ ବେଆଇନ ଭାବେ ପାରମ୍ପରିକ ପୋଡ଼ୁ ଚାଷ ନା ରେ କୋଟି କୋଟି ଟଙ୍କା ମୂଲ୍ୟର ବର୍ଷ ବର୍ଷ ଧରି ବଞ୍ଚି ରହିଥିବା ବହୁ ବଡ ବଡ ମୂଲ୍ୟବାନ ଶାଳ ପିଆଶାଳ ଶାଗୁଆନ ଗଛ କୁ କାଟି ପୋଡୁ ଚାଷ କରୁଛନ୍ତି ଅଞ୍ଚଳବାସୀ । ବନ ବିଭାଗ ପକ୍ଷରୁ ଚାରା ଓ ବୃକ୍ଷ ରୋପଣ , ଉଜୁଡା ଜଙ୍ଗଲ ର ପୁନଃ ଉଦ୍ଧାର , ନୂତନ ଜଙ୍ଗଲ ସୃଷ୍ଟି , ବନ୍ୟ ସୁରକ୍ଷା , ବନ୍ୟ ଉନ୍ନତି କାମ୍ପା ଯୋଜନା ଭଳି ବିଭିନ୍ନ ଯୋଜନା ମାଧ୍ୟମରେ ସରକାର କୋଟି ଟଙ୍କା ବ୍ୟୟ ବରାଦ କରିଥାନ୍ତି । ସରକାର ଯେଉଁ ମହତ ଉଦେଶ୍ୟ ରେ ଏହି ଯୋଜନା ପ୍ରଣୟନ କରିଛନ୍ତି ଯୋଜନା ସଫଳ ହେବା ପରିବର୍ତେ ବନଖଣ୍ଡ ଅଧିକାରୀ ଙ୍କର ଲାଭଖୋର ମନଭାବ ଏବଂ ଅପାରଗତା ଯୋଗୁଁ ଯୋଜନା ବିଫଳ ହେଉଛି । ଯାହାର ଜ୍ୱଳନ୍ତ ଉଦାହରଣ ରହିଛି ବାଲିଗୁଡା ବନଖଣ୍ଡ ଅଧିନସ୍ଥ ବନାଞ୍ଚଳ ରେଞ୍ଜ ଗୁଡିକର ଶହ ଶହ ଏକର ଜମିରେ ପୋଡ଼ୁ ଚାଷ ନିମିତ୍ତ ଜଙ୍ଗଲ ନଷ୍ଟର ପ୍ରକୃତ ଚିତ୍ର । ବାଲିଗୁଡା ବନଖଣ୍ଡ ଅଧିକାରୀ ଜଙ୍ଗଲ ଧ୍ୱଂସ ପ୍ରତି ଗୁରୁତ୍ୱ ନ ଦେଇ ନୂତନ ଜଙ୍ଗଲ ସୃଷ୍ଟି ନିମନ୍ତେ ବୃକ୍ଷ ରୋପଣ କାର୍ଯ୍ୟକ୍ରମ ପ୍ରତି ଅଧିକ ଗୁରୁତ୍ୱ ଦେଉଥିବା ଜଣାପଡିଛି । ଦିନ ଦ୍ବୀ ପ୍ରହରରେ ମୂଲ୍ୟବାନ ଗଛ ଗୁଡିକ ଜଙ୍ଗଲ ରୁ ନଷ୍ଟ ହୋଇ ଯାଉଥିବା ବେଳେ ବନ ବିଭାଗ ନୀରବ ଦ୍ରଷ୍ଟା ସାଜିଥିବା ଅଭିଯୋଗ ହେଉଛି l ବାଲିଗୁଡା ବନଖଣ୍ଡ ଅଧିକାରୀ ଜଙ୍ଗଲ ସୁରକ୍ଷା ପ୍ରତି ଗୁରୁତ୍ୱ ନଦେଇ ବୃକ୍ଷ ରୋପଣ କାର୍ଯ୍ୟକ୍ରମ ରୁ ଅଧିକ ପିସି ପାଇବା ନିମନ୍ତେ ରେଞ୍ଜର, ଫରେଷ୍ଟର, ଫରେଷ୍ଟ ଗାର୍ଡ ଏବଂ ପାରା ଷ୍ଟାଫ ମାନଙ୍କୁ ବୃକ୍ଷ ରୋପଣ କାର୍ଯ୍ୟରେ ଲଗାଇ ସର୍ବଦା ବ୍ୟସ୍ତ ରହୁଥିବା ଦେଖିବା କୁ ମିଳିଛି । ଗାଁ ଗାଁ ରେ ବନ୍ୟ ସରଂକ୍ଷଣ ସମିତି ଗୁଡିକ ଗଠନ କରାଯାଇଛି ହେଲେ ସେହି ଅଞ୍ଚଳ ଉନ୍ନତି କରଣ ଏବଂ ବୃକ୍ଷ ରୋପଣ ନାଁ ରେ କୋଟି କୋଟି ଟଙ୍କା ହଡପ ହେଉଥିବା ଅଭିଯୋଗ ହେଉଛି । ବନଖଣ୍ଡ ଅଧିକାରୀ ଙ୍କର ଏତାଦୃଶ କାର୍ଯ୍ୟ ଦେଖି ବାଲିଗୁଡା ବନଖଣ୍ଡ ରେ ଗୋଦରା କୋଡେ ଯେତେ ମାଡେ ସେତେ ନ୍ୟାୟ ରେ ଚାଲିଛି ବୋଲି ଆଲୋଚନା ଜୋର ଧରିଛି । ବାଲିଗୁଡା ବନଖଣ୍ଡ ଅଧିକାରୀ ବନପାଳ ମାନଙ୍କୁ ୩୫ ପ୍ରତିଶତ ଠାରୁ ଅଧିକା ପିସି ମାଗୁଥିବା ଅଭିଯୋଗ ହେଉଛି । ଯେଉଁ ବନପାଳ ବନଖଣ୍ଡ ଅଧିକାରୀ ଙ୍କର ଚାହିଦା ମୁତାବକ ପିସି ଦେଉ ନାହାନ୍ତି ସେହି ଅଭିଜ୍ଞ ତାଲିମ ପ୍ରାପ୍ତ ସିନିଅର ବନପାଳ ହରିଶ ପ୍ରଧାନ, ଗିରିଶ ସାହୁ,ଦେବାଶିଷ ଚୌଧୁରୀ, ଜ୍ୟୋତିରାଜ ମଲ୍ଲିକ, ପ୍ରତିମା ନାୟକ , କୈଳାସ ସାହୁ, ପ୍ରିୟଙ୍କା ପ୍ରଧାନ, ଟିକେଶ୍ୱର ବେହେରା, ଶିବାଜୀ ବେହେରା, ଡେ଼ପୁଟି ରେଞ୍ଜର ଅନ୍ତର୍ଯ୍ୟାମୀ ସାହୁ , ଙ୍କୁ କୁଆଡେ ଡିଭିଜନ କାର୍ଯ୍ୟାଳୟ ଏବଂ ରେଞ୍ଜ କାର୍ଯ୍ୟାଳୟ ରେ ଆଟାଜମେଣ୍ଟ କରିଥିବା ବେଳେ ବନଖଣ୍ଡ ଅଧିକାରୀ ଙ୍କୁ ଯେଉଁ ବନ କର୍ମଚାରୀ ସନ୍ତୁଷ୍ଟ କରିପାରୁଛନ୍ତି ସେହି ଅନଭିଜ୍ଞ ବନରଖି ମାନଙ୍କୁ ବିଭିନ୍ନ ସେକ୍ସନ ଦାୟିତ୍ବ ଦିଆଯାଇଛି । ଯାହା ଫଳରେ ଅଫିସ କର୍ମଚାରୀ ଓ ବନ ବିଭାଗ କର୍ମଚାରୀ ଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ସେହିଭଳି ବଡ଼ ବଡ଼ ଗଛ ଲଗାଇବା ନିମନ୍ତେ ଦଣ୍ଡପଦର ଠାରୁ ଦାରିଙ୍ଗବାଡି ୫୯ ନଂ ଜାତୀୟ ରାଜପଥ କଡ଼ରେ ଟ୍ରାନ୍ସ ଲୋକେସନ ସ୍ଥାନାନ୍ତର ଯୋଜନା ରେ ଦୁର୍ନୀତି କରି ଲକ୍ଷ ଲକ୍ଷ ଟଙ୍କା ହଡପ କରିଥିବା ବନଖଣ୍ଡ ଅଧିକାରୀ ଙ୍କ ନାମରେ ସଙ୍ଗୀନ ଅଭିଯୋଗ ରହିଛି । ବାଲିଗୁଡା ବନଖଣ୍ଡ ଅଧିକାରୀ ଙ୍କ ମାନସିକ ନିର୍ଯ୍ୟାତନା ଅପମାନ ସହ୍ୟ କରି ନପାରି ପୁଷ୍ପିତା ନାୟକ, ଇନ୍ଦିରା ନାୟକ ଏବଂ ନବୀନ ଚନ୍ଦ୍ର ମଲ୍ଲିକ ନାମକ ୩ ଜଣ ବନପାଳ ଚାକିରୀ ର କାର୍ଯ୍ୟକାଳ ସମୟ ଥାଇ ମଧ୍ୟ ବାଧ୍ୟ ହୋଇ ଅବସର ନେଇଥିବା ଜଣାପଡିଛି ।ତତ୍ ସହିତ ଜଣେ ବନପାଳ ପ୍ରତି ଆକ୍ରୋଶ ମୂଳକ ପଦକ୍ଷେପ ନେଇ ସରକାରୀ ସମ୍ପତି ହେରଫେର ଅଭିଯୋଗ ରେ ମିଥ୍ୟା ଆରୋପ ଲଗାଇ କାର୍ଯ୍ୟ ରୁ ନିଲମ୍ବିତ ଥିବା ଜଣାପଡିଛି । ହେଲେ ଥାନାରେ ବନପାଳ ଙ୍କ ନାମରେ କୌଣସି ମାମଲା ରୁଜୁ ହୋଇ ନାହିଁ । କେଉଁ କାରଣରୁ ବନପାଳ ଙ୍କୁ ନିଲମ୍ବନ କରାଗଲା ତାହା ସ୍ପଷ୍ଟ କରୁନି ବନ ବିଭାଗ । ବନଖଣ୍ଡ ଅଧିକାରୀ ଙ୍କର ମନମୁଖୀ କାର୍ଯ୍ୟକଳାପ ଓ କାର୍ଯ୍ୟାନୁଷ୍ଠାନ ଭୟରେ ଅନେକ କର୍ମଚାରୀ ଛୁଟି ରେ ରହିବାକୁ ଶ୍ରେୟ ମଣୁଛନ୍ତି ।ସେକ୍ସନ ଗୁଡିକ ରେ ଅନଭିଜ୍ଞ ବନରଖି ମାନଙ୍କୁ ଦାୟିତ୍ୱ ଦିଆଗଲେ ଆମ ଜଙ୍ଗଲ କେତେ ସୁରକ୍ଷିତ ତାହା ସହଜେ ଅନୁମେୟ ।ଜଙ୍ଗଲ ବିଭାଗ ରେ ହୋଇଥିବା ଦୁର୍ନୀତି ର ଭିଜିଲାନ୍ସ ତଦନ୍ତ ପାଇଁ ଦାବି ହୋଇଛି ।
