ଭୁବନେଶ୍ୱର : ବରମୁଣ୍ଡାଠାରେ ନିର୍ମାଣାଧୀନ ଆନ୍ତଃରାଜ୍ୟ ବସ୍ ଟର୍ମିନାଲ (ଆଇଏସ୍ବିଟି) ସହିତ ଚନ୍ଦ୍ରଶେଖରପୁରଠାରେ ସୁଲଭ ଗୃହ ନିର୍ମାଣ ଏବଂ ଇନ୍ଫୋସିଟି ନିକଟରେ ଇନ୍କ୍ୟୁବେସନ୍ ଟାୱାର ଆଦିର ନିର୍ମାଣ କାର୍ଯ୍ୟକୁ ରବିବାର ୫-ସଚିବ ଭି. କେ. ପାଣ୍ଡିଆନ, ପୂର୍ତ୍ତ ସଚିବ ଡକ୍ଟର କ୍ରିଷନ କୁମାର ଓ ଅନ୍ୟ ବରିଷ୍ଠ ଅଧିକାରୀମାନେ ସମୀକ୍ଷା କରିଛନ୍ତି । ୧୮୦ କୋଟି ଟଙ୍କା ବ୍ୟୟରେ ବରମୁଣ୍ଡାଠାରେ ୧୫.୫ ଏକର ଜମି ଉପରେ ଆଇଏସ୍ବିଟି ନିର୍ମାଣ କରାଯାଉଛି । ଏହାକୁ ଜୁନ୍ ୨୦୨୨ ସୁଦ୍ଧା ସାରିବାକୁ ଲକ୍ଷ୍ୟ ରଖାଯାଇଛି । ଖଣ୍ଡଗିରିରେ ଥିବା ବସ୍ ଡିପୋ ମଧ୍ୟ ୩୦୦ ବସ୍ ପାର୍କିଂ କ୍ଷମତା ବିଶିଷ୍ଟ ଏହି ପ୍ରକଳ୍ପର ଏକ ଅଂଶବିଶେଷ । କାର୍ଯ୍ୟଗୁଡିକର ଗୁଣବତ୍ତା ବଜାୟ ରଖିବା ଏବଂ ସମୟସୀମା ଅନୁଯାୟୀ ସମାପ୍ତି ଉପରେ ଶ୍ରୀ ପାଣ୍ଡିଆନ ଗୁରୁତ୍ୱାରୋପ କରିଛନ୍ତି ।
ଜୟଦେବ ବିହାର-ପଟିଆ ରାସ୍ତାରେ ଟ୍ରାଫିକ ଭିଡ ହ୍ରାସ କରିବାକୁ ବାମ ସମାନ୍ତରାଳ ପ୍ରକଳ୍ପ ପୂର୍ତ୍ତ ବିଭାଗ ଦ୍ୱାରା କାର୍ଯ୍ୟକାରୀ ହେଉଛି । ଏହି ରାସ୍ତାଟି ସିଆରପିଏଫ୍ ବର୍ଗକୁ ଇନ୍ଷ୍ଟିଟ୍ୟୁଟ ଅଫ୍ ମ୍ୟାଥମେଟିକ୍ସ ସହିତ ପର୍ଯ୍ୟାୟରେ ସଂଯୋଗ କରିବ । ନିର୍ମାଣ ପାଇଁ ମୋଟ୍ ୧୩.୬ କିଲୋମିଟର ରାସ୍ତା ଆକଳନ କରାଯାଇଛି । ଜମି ସମ୍ବନ୍ଧୀୟ ସମସ୍ୟାର
ଶୀଘ୍ର ସମାଧାନ ପାଇଁ ୫-ଟି ସଚିବ କହିଛନ୍ତି । ବିଡିଏ ପିପିପି ଆଧାରରେ ଚନ୍ଦ୍ରଶେଖରପୁରରେ ସୁଲଭ ଗୃହ ନିର୍ମାଣ ପ୍ରକଳ୍ପ ପ୍ରତିଷ୍ଠା କରୁଛି । ୨୬୦୦ ଘର ବିଶିଷ୍ଟ ଏହି ପ୍ରକଳ୍ପ ୨୦.୨୧ ଏକରରୁ ଅଧିକ କ୍ଷେତ୍ରରୁ ଆସୁଛି ଏବଂ ସେଥିରୁ ୬.୫ ଏକର ପିପିପି ଭାଗିଦାରଙ୍କ ବିକାଶ ପାଇଁ ରହିଛି । ଏହି କଲୋନୀରେ ପ୍ରାଥମିକ ବିଦ୍ୟାଳୟ, ସ୍ୱାସ୍ଥ୍ୟକେନ୍ଦ୍ର, ଶପିଂ ଏରିଆ, ଖେଳପଡିଆ ଆଦିର ସୁବିଧା ରହିବ ।
ଏହି ପ୍ରକଳ୍ପ ସେପ୍ଟେମ୍ବର ୨୦୨୨ ସୁଦ୍ଧା ଦୁଇ ପର୍ଯ୍ୟାୟରେ ଶେଷ ହେବ । ଏହି ପ୍ରକଳ୍ପରେ ଘର ଆବଣ୍ଟନ ଯେଭଳି ଶୀଘ୍ର ହୋଇପାରିବ ତାହା ଉପରେ ଗୁରୁତ୍ୱ ଦିଆଯାଇଛି । ଇନ୍ଫୋସିଟି ନିକଟରେ ଥିବା ଇନ୍କ୍ୟୁବେସନ୍ ଟାୱାରକୁ ୨୨୧ କୋଟି ଟଙ୍କା ମୂଲ୍ୟରେ ଇଡ୍କୋ ଦ୍ୱାରା ନିର୍ମାଣ କରାଯାଉଛି । ଦୁଇଟି ବେସ୍ମେଣ୍ଟ ଫ୍ଲୋର ସହିତ ଦୁଇଟି ୧୨ମହଲା କୋଠା ହେଉଛି ଯାହାର ନିର୍ମାଣ କ୍ଷେତ୍ର ୩.୩୬ ଲକ୍ଷ ବର୍ଗଫୁଟ ରହିବ । ଷ୍ଟାର୍ଟ ଅପ୍ ଓ ହବ୍ ପାଇଁ ୫ମହଲା ଏବଂ ୬୭,୫୯୪ ବର୍ଗଫୁଟ ଅଞ୍ଚଳ ଏହି ପ୍ରକଳ୍ପର ଅଂଶ ହେବ । ଚଳିତବର୍ଷ ଡିସେମ୍ବର ସୁଦ୍ଧା ଏହି ପ୍ରକଳ୍ପ କାର୍ଯ୍ୟ ଶେଷ ହେବାର ଲକ୍ଷ୍ୟ ରହିଛି । ଧାର୍ଯ୍ୟ ସମୟ ମଧ୍ୟରେ ପ୍ରକଳ୍ପ କାର୍ଯ୍ୟ ସାରିବାକୁ ୫-ଟି ସଚିବ କହିଛନ୍ତି । ସମୀକ୍ଷା ସମୟରେ ବିଡିଏ ଉପାଧ୍ୟକ୍ଷ ତଥା ବିଏମ୍ସି କମିଶନର ସଞ୍ଜୟ କୁମାର ସିଂହ, ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସଚିବ ଆର.ଭିନିଲ କ୍ରିଷ୍ଣା, ଇଡ୍କୋର କାର୍ଯ୍ୟନିର୍ବାହୀ ନିର୍ଦ୍ଦେଶକ ଭୂପିନ୍ଦର ପୁନିଆ ଏବଂ ପ୍ରକଳ୍ପର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
Comments are closed.