ଦୁସାନବେ : ସାଂଘାଇ ସହଯୋଗ ସଂଗଠନ (ଏସ୍ସିଓ) ଅଞ୍ଚଳ ସଂପ୍ରତି ଯେଉଁ ଆହ୍ୱାନର ସାମ୍ନା କରୁଛି ତାହା ଶାନ୍ତି, ନିରାପତ୍ତା ଏବଂ ବିଶ୍ୱାସ ଅଭାବ ଭଳି ପରିସ୍ଥିତି ସହିତ ସଂପୃକ୍ତ । ମୌଳବାଦର ବୃଦ୍ଧି ଏହିସବୁ ସମସ୍ୟା ପଛରେ ମୂଳ କାରଣ ହୋଇଛି । ଆଫଗାନିସ୍ତାନର ସାମ୍ପ୍ରତିକ ଘଟଣାବଳୀ ଏଭଳି ବିଦର ସୂଚନା ଦେଉଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି । ଦୁସାନବେଠାରେ ଶୁକ୍ରବାର ଆୟୋଜିତ ଏ୍ସସିଓ ସମ୍ମିଳନୀରେ ନୂଆଦିଲ୍ଲୀରୁ ଭିଡିଓ କନ୍ଫରେନ୍ସିଂ ଜରିଆରେ ଉଦ୍ବୋଧନ ଦେଇ ମୋଦୀ କାହାର ନାମ ନନେଇ ଚାଇନାକୁ ଲକ୍ଷ୍ୟ କରି କହିଥିଲେ, କୌଣସି ସଂଯୋଗକାରୀ ପ୍ରୟାସ କେବେ ହେଲେ ଏକତରଫା ରାସ୍ତା ହୋଇପାରିବ ନାହିଁ । ପାରସ୍ପରିକ ବିଶ୍ୱାସ ଭାବ ସୁନିଶ୍ଚିତ କରିବା ଅତ୍ୟନ୍ତ ଗୁରୁତ୍ୱୂର୍ଣ୍ଣ ଏବଂ ସଂଯୋଗକାରୀ ପ୍ରକଳ୍ପଗୁଡିକ ପରାମର୍ଶ ଆଧାରିତ, ସ୍ୱଚ୍ଛ ଏବଂ ସହଭାଗୀ ହେବା ଆବଶ୍ୟକ । ଏଭଳି କ୍ଷେତ୍ରରେ ସମସ୍ତ ରାଷ୍ଟ୍ରର ଆଞ୍ଚଳିକ ସଂହତିକୁ ସମ୍ମାନ ପ୍ରଦର୍ଶନ କରାଯିବା ଉଚିତ ।
ସୂଚନାଯୋଗ୍ୟ ଯେ ତାଜିକିସ୍ତାନର ଦୁସାନବେଠାରେ ଏସ୍ସିଓର ଏହା ୨୧ତମ ବୈଠକ ଥିଲା । ବୈଠକରେ ଭାରତର ବୈଦେଶିକ ମନ୍ତ୍ରୀ ଏସ୍.ଜୟଶଙ୍କର ଦୁସାନବେରେ ଉପସ୍ଥିତ ଥିବାବେଳେ ପ୍ରଧାନମନ୍ତ୍ରୀ ଭିଡିଓ କନ୍ଫରେନ୍ସିଂ ଜରିଆରେ ସେଥିରେ ଯୋଗ ଦେଇଥିଲେ । ଏହି ବୈଠକରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ, ସେ ଦେଶର ବୈଦେଶିକ ମନ୍ତ୍ରୀ ଶାହ ମାହମୁଦ କ୍ୟୁରେସି, ଚୀନ ରାଷ୍ଟ୍ରପତି ସି ଜିନ୍ ପିଙ୍ଗ, କାଜାଖସ୍ତାନ, କିରଗିଜସ୍ତାନର ରାଷ୍ଟ୍ରମୁଖ୍ୟ, ରୁଷ ରାଷ୍ଟ୍ରତି ଭ୍ଲାଦିମିର ପୁତିନ, ତାକିକିସ୍ତାନ ଓ ଉଜବେକିସ୍ତାନ ରାଷ୍ଟ୍ରମୁଖ୍ୟ ଯୋଗଦେଇଥିଲେ । ଶୁକ୍ରବାର ଏସ୍ସିଓ ବୈଠକ ପ୍ରଥମ ଥର ପାଇଁ ହାଇବ୍ରିଡ ପଦ୍ଧତିରେ ଆୟୋଜିତ ହୋଇଥିଲା । ଅର୍ଥାତ କିଛି ନେତୃବୃନ୍ଦ ବୈଠକରେ ଶାରୀରିକ ଭାବରେ ଉପସ୍ଥିତ ଥିବାବେଳେ ଆଉ କେତେକ ଭିଡିଓ କନ୍ଫରେନ୍ସିଂ ଜରିଆରେ ସାମିଲ ହୋଇଥିଲେ । ଭାରତର ପ୍ରଧାନମନ୍ତ୍ରୀ କହିଥିଲେ, କେନ୍ଦ୍ର ଏସିଆ ସହିତ ଯୋଗାଯୋଗ ବ୍ୟବସ୍ଥାରେ ବୃଦ୍ଧି ଘଟାଇବାକୁ ଭାରତ ପ୍ରତିବଦ୍ଧ ରହିଛି ଏବଂ ଭୂଭାଗ ଦ୍ୱାରା ପରିବେଷ୍ଟିତ କେନ୍ଦ୍ର ଏସୀୟ ରାଷ୍ଟ୍ରଗୁଡିକ ଭାରତର ବିଶାଳ ବଜାର ସହିତ ସଂଯୁକ୍ତ ହୋଇ ବିଶେଷ ଫାଇଦା ପାଇପାରିବେ ବୋଲି ମୋଦୀ କହିଥିଲେ ।
Comments are closed.