ତେହେରାନ୍, ୧୬ ।୮ : ପଶ୍ଚିମ ଏସିଆରେ ଇସ୍ରାଏଲ୍ ଏବଂ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଐତିହାସିକ ବନ୍ଧୁତାକୁ ଇରାନ ଏକ ବଡ଼ ଭୁଲ ବୋଲି କହିଛି । ଇରାନ କହିଛି ଯେ ୟୁଏଇ ପାଲେଷ୍ଟାଇନବାସୀଙ୍କୁ ପ୍ରତାରଣା କରିଛି । ଇରାନର ରାଷ୍ଟ୍ରପତି ହାସନ ରୁହାନି ଶନିବାର ଏକ ଅଭିଭାଷଣରେ କହିଛନ୍ତି ଯେ ୟୁଏଇର ଏହି ପଦକ୍ଷେପ ଏକ ବଡ ଭୁଲ । ରାଷ୍ଟ୍ରପତି ରୋହାନି କହିଛନ୍ତି ଯେ ୟୁଏଇ ପାଲେଷ୍ଟାଇନ ପ୍ରସଙ୍ଗରେ ବିଶ୍ୱାସଘାତକତା କରିଛି । ୟୁଏଇକୁ ଚେତାବନୀ ଦେଇ ସେ କହିଛନ୍ତି ଯେ ଇସ୍ରାଏଲ୍କୁ ଆରବ ଅଞ୍ଚଳରେ ପାଦ ଦେବାରେ ଯେଭଳି ଭୁଲ ନକରନ୍ତୁ । ଇରାନର ବୈଦେଶିକ ମନ୍ତ୍ରଣାଳୟ ଏହା ମଧ୍ୟ କହିଛି ଯେ ଇସ୍ରାଏଲ ଏବଂ ୟୁଏଇ ମଧ୍ୟରେ ହୋଇଥିବା ଏହି ଚୁକ୍ତି ପାଲେଷ୍ଟାଇନୀୟମାନଙ୍କ ପିଠିରେ ଛୁରାମାଡ଼ ଭଳି । ସୂଚନାଯୋଗ୍ୟ ଯେ ୟୁଏଇ ୧୩ ଅଗଷ୍ଟରେ ଇସ୍ରାଏଲ ସହିତ ଏକ ଐତିହାସିକ ଚୁକ୍ତି କରିଛି । ଏହି ଚୁକ୍ତି ପଛରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ବିଶ୍ୱାସ କରାଯାଏ । ଆମେରିକାର ସମର୍ଥନ ସହିତ ଏହି ଚୁକ୍ତିନାମାର ଉଦ୍ଦେଶ୍ୟ ଇରାନର ଶକ୍ତି ଏବଂ ପଶ୍ଚିମ ଏସିଆରେ ଏହାର ପ୍ରାଧାନ୍ୟକୁ ରୋକିବା ଏବଂ ଆରବ ଅଞ୍ଚଳର ଅନ୍ୟ ଦେଶମାନଙ୍କୁ ପ୍ରୋତ୍ସାହିତ କରିବା ।
