ଅନାଥଙ୍କୁ ଆପଣାଇଲେ : ୫ ହଜାରରୁ ଅଧିକ ଶିଶୁଙ୍କୁ ନବୀନଙ୍କ ସହାୟତା

0 70

ଭୁବନେଶ୍ୱର : କୋଭିଡରେ ଅନାଥ ଶିଶୁଙ୍କୁ ଆପଣାଇଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେମାନଙ୍କୁ ଆଶୀର୍ବାଦ ଯୋଜନାରେ ସାମିଲ କରି ୧୮ ବର୍ଷ ଯାଏ ଭତ୍ତା ଦେଉଛନ୍ତି । ଏପ୍ରିଲ ପହିଲାରୁ ୫ହଜାରରୁ ଅଧିକ ଅନାଥଙ୍କୁ ସହାୟତା ପ୍ରଦାନ ହୋଇ ସାରିଛି । ଯେଉଁଥିରେ ଉଭୟ ବାପା ମାଆଙ୍କୁ ହରାଇଥିବା ଶିଶୁଙ୍କ ସମେତ ଜଣେ ଅଭିଭାବକଙ୍କୁ ହରାଇଥିବା ଶିଶୁ ବି ସାମିଲ ଅଛନ୍ତି । ଜୀବନ ନେଉଛି କୋଭିଡ, ଜୀବନ ଗଢୁଛନ୍ତି ରାଜ୍ୟ ସରକାର । କୋଭିଡ ଯୋଗୁଁ ଅନାଥ ଶିଶୁଙ୍କ ତାଲିକା ବଢିବାରେ ଲାଗିଛି । ଯେତିକି ଦୁଃଖଦାୟକ ସେମାନଙ୍କ ବାଲ୍ୟକାଳ, ସେତିକି ସମ୍ବେଦନଶୀଳ ରାଜ୍ୟ ସରକାର । ଏଯାଏ ଆଶୀର୍ବାଦ ଯୋଜାନାରେ ୫ ହଜାରରୁ ଅଧିକ ଅନାଥଙ୍କ ବ୍ୟାଙ୍କ ଆକାଉଣ୍ଟକୁ ସହାୟତା ଅର୍ଥ ପ୍ରଦାନ କରାଯାଉଛି । ଉଭୟ ବାପା ମାଆଙ୍କୁ ହରାଇଥିବା ଶିଶୁଙ୍କୁ ୨୫୦୦ ଟଙ୍କା ଓ ଜଣଙ୍କୁ ହରାଇଥିଲେ ଆକାଉଣ୍ଟକୁ ଯାଉଛି ୧୫୦୦ ଟଙ୍କା ।

ସେହିପରି ଶିଶୁ ଯତ୍ନ ଅନୁଷ୍ଠାନରେ ଥିବା ଶିଶୁ ପାଉଛନ୍ତି ୧୦୦୦ ଟଙ୍କାର ସହାୟତା । ଏହାର କାର୍ଯ୍ୟକାରିତା ନେଇ ପୁରୀ ଜିଲ୍ଲାରେ ସମୀକ୍ଷା କରିଛନ୍ତି ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ଟୁକୁନି ସାହୁ । ୫୨୮ ଆବେଦନ ଭିତରୁ ୧୧୭ ସହାୟତା ପାଇଥିବାବେଳେ ଆହୁରି ୧୧୨ଙ୍କୁ ବି ଟଙ୍କା ମିଳିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନାଥଙ୍କର ନାଥ ସାଜିଛନ୍ତି । ଏଭଳି ଦୃରଦୃଷ୍ଟି ଯୋଜନା ପାଇଁ ତାଙ୍କୁ ବିଭିନ୍ନ ମହଲରୁ ପ୍ରଶଂସା ମିଳୁଛି । ଗତବର୍ଷ ଠାରୁ ରାଜ୍ୟରେ କୋଭିଡ କାୟା ବିସ୍ତାର କରିଛି । ସେ ସମୟରୁ ଅନାଥ ହୋଇଥିବା ଶିଶୁଙ୍କୁ ସାମିଲ କରିବାକୁ ଶିଶୁ ଯତ୍ନ ଅନୁଷ୍ଠାନ ନିବେଦନ କରିଛି । ଅନାଥ ଶିଶୁଙ୍କ ପାଠପଢା ପାଇଁ ଗ୍ରୀନ ପ୍ୟାସେଜ ଯୋଜନା କରାଯାଇଛି । ଏଥିସହ ମଧୁବାବୁ ପେନସନ୍ ଯୋଜନାରୁ ସହାୟତା ମିଳୁଛି ।

Leave A Reply

Your email address will not be published.